О́mirdiń qyzyǵy men shyjyǵy qatar júredi emes pe, elimizde «Er ólip, Esil buzylyp jatqanda» Mysyrdan Petropavlǵa qýanyshty habar jetti. Osyndaǵy Hýrgada qalasynda ótken «Mysyr – shoý áleminde kún mekeni» atty I halyqaralyq festıval-konkýrsta S.Muqanov atyndaǵy qazaq mýzykalyq drama teatrynyń Sensitive bı ansambli Gran-prı júldesin jeńip aldy.
Sensitive (Sezimdiler) bal bıleri ansambliniń ózindik ereksheligi bar. Ol estý qabileti tómen balalardyń Petropavldaǵy mektep-ınternatynda 2006 jyly qurylǵan. Adamdardyń bir múshesi kem bolsa basqa aǵzanyń qabileti artady degen qaǵıda ejelden bar. Mundaǵy jastardyń bıge qabileti zor bolýy múmkin ekenin shamalaǵan Qyzyljardaǵy E.Serkebaev atyndaǵy ónerde daryndy balalarǵa arnalǵan mektep-ınternatynyń bı mamany Olga Rostovshıkova kelip, osynda bı ansamblin qurǵan. Mamannyń boljamy uzamaı aqtalyp, E.Voropaeva, A.Saıynova, D.Qanǵojın, A.Radısa, M.Novıkova, E.Kýzmın, E.Chýb, P.Tkachenko sekildi jastar bıge ıkemdilik tanytyp, jaqsy jetistikterge jete bastaǵan. O.Rostovshıkova da olarǵa 15 jyldan beri bıdiń kásibı qyr-syrlaryn úıretip keledi. Ansambl 2017 jyly «Shapaǵat» medalimen marapattaldy.
2012-2013, 2017-2018 oqý jyldarynda Olga Nıkolaevna «Kreatıvtiligi jáne shyǵarmashylyǵy úshin» dıplomdaryn alǵan. Ansambldiń repertýary da jańǵyrtylyp, oǵan latynamerıkalyq, eýropalyq jáne osy zamanǵy horeografııalyq jańa naqyshtar engizilip turady. Qazir ansambl oblystyq, respýblıkalyq jáne halyqaralyq konkýrstarǵa qatysyp júrgen estý qabileti tómen adamdardan turatyn jalǵyz respýblıkalyq ujym. Osy jyldarda Sensitive respýblıkalyq «Juldyzaı» konkýrsynyń úsh dúrkin jeńimpazy atanyp basqa konkýrstardan 6 Gran-prı, 18 ret birinshi oryndy jeńip aldy.
Jastary mektep túlekteri qatarynan asyp ketken soń ujym múshelerin taratpaı, byltyr oblys ákiminiń sheshimimen ansambl estý qabileti tómen balalardyń mektep-ınternatynan S.Muqanov atyndaǵy qazaq mýzykalyq drama teatryna qosylǵan. Mine, endi ansambl jańa ujymyna halyqaralyq deńgeıde olja salyp otyr. Talantty ujym múshelerin Mysyrǵa qazaq teatrynyń ártisi, rejısserdiń kómekshisi Aıbol Qasym bastap barǵan edi. Sapar sátti bolyp, bı ujymy oblys qana emes elimiz úshin úlken tabysqa qol jetkizip otyr. Jeńisterińiz jeńiske ulassyn deımiz biz de...
Soltústik Qazaqstan oblysy