OQYRMAN
... ALǴYS AITADY
NUR JAÝSYN!
Men toǵyz balanyń anasymyn. Kópten beri sýsamyr syrqatyna shaldyqqan edim. Onyń ústine osydan on jyl buryn jol apatyna túsip, es-tússiz jatqanym bar. Áıteýir, dárigerlerdiń jankeshtiliginiń arqasynda qatarǵa qosylyp edim. Qazir ekinshi toptaǵy múgedekpin. Álsin-álsin tekserýden ótip júremin. Sonda maǵan Astana qalasy travmotologııa ınstıtýtynyń ujymy kórsetken elgezektiktiń shegi joq ekenin sezinip júrmin. Olarǵa degen analyq aq alǵysymdy jaýdyramyn. Buǵan qosa, Sarysý aýdandyq aýrýhanasynyń bas dárigeri S.Begıev bastaǵan K.Tańbolatqyzy men A.Qyrǵyzbaevaǵa, K.Ájibekov pen K.Sahovaǵa, t. b. medısına qyzmetkerlerine Allanyń nury jaýsyn dep aq batamdy beremin.
О́zimiz súıip oqıtyn “Egemen Qazaqstanda” meniń tilegim tektes ystyq lebizder jıi jarııalanyp jatatynyna kýámiz. Muny hosh kóremiz. Jıilep ketti demeı, gazette osyndaı aq alǵystarǵa oryn únemi berilgeni jón. Atam qazaq: “Jaýynmen jer kógeredi, alǵyspen el kógeredi”,– dep bekerden-beker aıtpaǵan ǵoı, balalarym!
Dildash TО́LEKEEVA, II toptaǵy múgedek ana.
Jambyl oblysy, Jańatas qalasy.
... TILEGIN JETKIZEDI
“BALDÁÝRENNIŃ” BAL QYZYǴY
Elbasy N.Á.Nazarbaevtyń qoldaýymen boı túzegen “Baldáýren” respýblıkalyq oqý-saýyqtyrý ortalyǵynda demalyp qaıtqan soń, qatty tolqyp qolyma qalam alyp otyrmyn. Ol Kókshetaýdyń bir kórikti múıisi – Shortan kóliniń jaǵasyna ornalasqan eken. Onda balalar demalýyna barlyq jaǵdaı jasalǵan. Balalar tek demalyp qana qoımaı, bilim alyp, qyzyqty treınıngter men konsertterge, sporttyq oıyndar men úıirmelerge qatysyp, ózderin jan-jaqty jetildire alady.
Qanshama dostar taptym deseńizshi, bul jerden. Elimizdiń túkpir-túkpirinen ǵana emes, Qytaı, Ulybrıtanııa, Vengrııa, Fransııa, t.b. shetel memleketterinen demalýǵa kelgen qurbylarymnyń keıbireýimen etene tanysyp, jaqyndasyp kettim. Men óz elim úshin maqtanatyn otansúıgishpin. Olarǵa týǵan Otanymnyń keshegisi men búgingisi týraly aıtyp berýge tyrystym. Sondaı syrlasý barysynda: “Bizdiń Qazaqstannyń balalary sheksiz baqytty, erteńine senimmen qaraıdy. Sebebi, Nursultan Ábishulyndaı atamyz bilimimiz ben tárbıemizge jaqsy jaǵdaı týǵyzyp otyr”,– dep ózimniń rızashylyǵymdy qosa bildiremin.
Shynynda da Qazaqstannyń balalary baqytty ǵoı.
Talshyn QANATOVA, Aqshı aýylyndaǵy S. Seıfýllın atyndaǵy orta mekteptiń 10 synyp oqýshysy.
Almaty oblysy, Alakól aýdany.
... OI BО́LISEDI
TEKSERÝDIŃ DE RETI BAR
Bizdiń aýdannyń mektepterinde ana bir jyldary, tipti byltyr da joǵary jaqtardan tekserýshiler jıilep, degbirimizdi alýshy edi. Jaı bir domalaq aryz izimen de kelip, jaǵalaı suraý salyp, olary oqý-tárbıe barysynyń kúrt nasharlaýyna ákelip soqtyratyn. Mundaı keleńsizdikter sońǵy kezde tyıyla bastady. Aýdannyń zań qorǵaý organdarynyń jiti aralasýymen ondaı retsiz tekserýlerge tyıym salynyp, qalypty jaǵdaı ornaǵanyna muǵalimder ujymy rızashylyq bildirýde. Áıtpese, ata-analardan aqsha jınapty, balalarǵa óz jumystaryn istettiripti sııaqty, t.b. qańqý sózderge bola mektep ishi nildeı buzylatyn.
Aıtaıyn degenim, retsiz tekserýlerge aldaǵy ýaqytta da qatań tyıym salynsa eken. Qazirgi jaǵdaıymyzǵa shúkirshilik etemiz. Osyndaı ilgerileýshilikke birden-bir sebepker bolǵan “Nur Otan” partııasyna alǵysymyz sheksiz. Bul partııanyń el ishindegi bedeli kúnnen-kúnge artyp kele jatqany qýantady. Retsiz tekserýlerge tejeý salýy sonyń bir aıǵaǵy.
Keles SÁTJAN.
Qyzylorda oblysy, Jańaqorǵan aýdany.
... JAZYLǴAN JAIDYŃ JAŃǴYRYǴY
ÁRKIM JAÝAPTY QARASA
“Egemen Qazaqstan” gazetiniń 2010 jylǵy 27 aqpan kúngi sanyndaǵy “Týý týraly kýáligimdi joǵaltyp jiberdi” dep atalatyn Sandýǵash Múslimovanyń maqalasy Uıǵyr aýdanynyń ádilet basqarmasynda talqylandy. Maqala jaryq kórgennen keıin biz onymen tikeleı baılanysa almaı, anasymen habarlastyq. Jańa kýálik alý úshin neler qajet ekendigin túsindirgen bolatynbyz. Qazaqstan Respýblıkasynyń “Neke jáne otbasy týraly” Zańyna sáıkes, týý týraly kýálikti joǵaltqan jaǵdaıda ol mindetti túrde qalpyna keltiriledi.
Maqala avtory joǵalǵan qujatyn qalpyna keltirý úshin turǵylyqty jeri boıynsha ádilet basqarmasyna jolyǵýy tıis edi. Áıtkenmen, ol azamatsha olaı istemegen. Maqalada kórsetilgen 25 jasqa tolǵan kezde jeke kýálikti aıyrbastaý úshin buryn týý týraly kýálikti talap etpeıtin. 16 jastaǵy jazylǵan formýlıarǵa sáıkes eshbir kedergisiz toltyrylatyn.
Kez kelgen qujatty jasaý úshin Qazaqstan Respýblıkasynyń qoldanystaǵy zańdaryna sáıkestendirip toltyrylatyndyǵyn maqala avtory bilýge tıisti. Onyń anasynyń qolyna qajet qujattardyń tizimi berilgen, sony jınastyryp turǵylyqty jerindegi ádilet basqarmasyna barsa, eshbir mashaqatsyz sheshiletin másele edi bul. Sony qaıyra bir esine salýdy jón kórdik.
A. KELMENBETOV, Uıǵyr aýdandyq ádilet basqarmasynyń bastyǵy,
Almaty oblysy
... TALAP ETEDI
SARSAŃǴA SALDY
Araǵa biraz ýaqyt tússe de, keıingi joly sabaq bolsyn degen oımen myna bir jáıtti baıandaǵaly otyrmyn. Elbasynyń halyqpen tikeleı baılanysqa shyqqan sátinde Astanadan 555-777 nómirine habarlasyp, kókeıkesti bir is jaıynda aıtqan bolatynmyn. Osyndaǵy tórt-bes qarttyń Semeı polıgonynda sarbazdar qatarynda júrip, ártúrli atom bombalarynyń synaǵyna qatysqanymyzdy, sol sebepti Jeńistiń 65 jyldyǵyna oraı qaıta qaralyp jatqan keıbir jeńildikterdi bizdiń de ıelenýimiz haqynda naqty suraý salǵan edim. Sodan jaýabyn tıisti organdar keıin qaıtarady degen soń, úmittenip júrgen edik. Ataýly jerine baryp, bilip te júrdik. Birine-biri silteıdi. Astana ákimdigine baryńyz degen soń, ol jaqty da áldeneshe ret torýyldadym. Nátıje shyqpady.
Meniń jasym 85-te. Qystyń aıazyna tońyp, taıǵanaqtap júrýim ońaıǵa soqpady. Biraq jaýapqa emeksitip qoıǵan soń, dámelenip júrgenim ras. Ázirge aýzymdy qý shóppen súrtip otyrmyn. Endi ne isteýim kerek?
Musa ShÁRIP, “Semeı-Nevada” qozǵalysynyń múshesi.
ASTANA.