Tótenshe jaǵdaı tártibine baǵynǵan Qaraǵandy oblysynda shekten shyqqan oqıǵalar ázirge baıqala qoıǵan joq. О́ndiristi óńirde ómir ózeni óziniń qalypty arnasymen aǵyp jatyr deýge negiz bar.
О́zińdikin almaı ósý joq
Qaraǵandy oblysyndaǵy alpaýyt kásiporyndar jergilikti qamtýdyń kórsetkishteri boıynsha ótken jyldy jaman qorytyndylamapty. Mysaly, «ArselorMıttal Temirtaý» kompanııasynda satyp alýdaǵy qazaqstandyq qamtý 72%-dy qurasa, «Qazaqmys» kásipornynda ol meje 50%-ǵa jetken. Atalǵan kásiporyndar jergilikti ákimdikpen eki jyl birlese jumys istegen ýaqyt ishinde satyp alýlar boıynsha otandyq taýarlardyń úlesin ulǵaıtyp qana qoımaı, jetkizýshiler tizimin de keńeıtý ústinde eken. Muny jergilikti qamtýdy damytý boıynsha yntymaqtastyqtyń qorytyndylary týraly ónerkásipshiler men jergilikti óndirýshilerdiń qatysýymen ótken onlaın-kezdesýde óńir basshysy Jeńis Qasymbek te qýattady. Oblystyq ónerkásip jáne ındýstrııalyq-ınnovasııalyq damý basqarmasynyń basshysy Murat Qydyrǵanbekov jergilikti óndirýshilerdiń shıkizattyq emes taýarlar kólemin arttyrýǵa basa nazar aýdarǵanyn aıtady.
– Jergilikti qamtý úlesin arttyrý úshin «ArselorMıttal Temirtaý» AQ-men birlesip memorandýmǵa qol qoıdyq. Oǵan Qaraǵandy oblysynyń 44 taýar óndirýshisi engizildi. 2021 jyldyń qorytyndysy boıynsha mundaı satyp alý kólemi 34,2 mlrd teńgeni qurady. Bul 2,9 mlrd teńgege artyq nemese 2020 jylmen salystyrǵanda 9,3%-ǵa ósti. «Qazaqmys» boıynsha bul soma 96,3 mlrd teńgeni qurady. Jergilikti taýarlardyń úlesi eki aksıonerlik qoǵamda da ósti, – dep málimdedi ol.
Oblys ákimi Jeńis Qasymbek jergilikti kompanııalardyń ashyq sıpatta jumys isteı bastaǵanyn atap ótti.
– Búginde oń ózgeristi baıqaýǵa bolady: qazaqstandyq jáne jergilikti qamtýdyń ósýi júrip jatyr. Kompanııalar ashyq bola bastady. Osy oraıda biz qaraǵandylyq kásiporyndardyń ónimderi suranysqa ıe bolýyna múddelimiz. Biz «baǵa – sapanyń» teń jaǵdaıynda sizder jergilikti taýarlardy satyp alýlaryńyz kerek dep esepteımiz. Osyndaı formatta kezdesýdi jalǵastyra beremiz jáne tolǵaǵy jetken máselelerdi birigip sheshemiz, – dedi ol.
Bul rette kompanııa ókilderi 2022 jylǵa arnalǵan satyp alý josparlaryn taıaý arada usynatyndyqtaryn aıtyp, ýáde berdi. Iаǵnı olar aldaǵy 1 aqpanǵa deıin «Qazaqstandyq qamtý» ınternet-portalynda ornalastyrylady. Oblys ákimi Qaraǵandy óńiriniń taýar óndirýshilerin qoldaý jáne júıe quraýshy kásiporyndardyń satyp alýlaryndaǵy jergilikti qamtýdy ulǵaıtý jónindegi jumystyń udaıy baqylaýda bolatynyn aıtty.
Tártipsizderdi táýbesine keltiredi
О́ńirde tótenshe jaǵdaı rejimi jáne oǵan baılanysty birqatar shekteýler sharalaryn buzýshylar azaımaı tur. Búginde engizilgen tártip pen erejeni buzǵan turǵyndarǵa qatysty 680 ákimshilik hattama toltyryldy. Sondaı-aq 69 adam ákimshilik qamaýǵa alynyp, 26 buzýshyǵa aıyppul salynǵan. Al 525 turǵyn eskertýmen qutylypty. Oblystyq polısııa departamentiniń málimetinshe, ótken táýlikte óńirde 34 qylmystyq quqyq buzýshylyq tirkelgen eken. Polısııa qyzmetkerleri olardyń 19-yn izin sýytpaı ashypty. Atap aıtqanda, tyıym salynǵan 45 zat tárkilengen. Onyń ishinde 18 dana tegis uńǵyly qarý bar. Sondaı-aq esirtki zattaryn saqtaýdyń 9 faktisi anyqtalǵan. Sheteldik 6 azamat kóshi-qon zańnamasyn buzǵany úshin ákimshilik jaýapkershilikke tartyldy.
– Polısııa departamenti turǵyndardy tótenshe jaǵdaı rejimin buzbaýǵa shaqyrady jáne polıseılerdiń jumysyna túsinistikpen qaraıtyn azamattarǵa alǵys bildiredi, – deıdi Qaraǵandy oblysynyń komendanty, jergilikti polısııa departamentiniń basshysy Erlan Faızýllın.
«Omıkron» omyraýlamasyn desek...
Qaraǵandy oblysynda epıdemııalyq ahýal aıaqastynan nasharlap ketti. Máselen, ótken táýlikte óńirde koronavırýs ınfeksııasyn juqtyrýdyń 669 jańa oqıǵasy tirkeldi. Osyǵan sáıkes, oblys keshegi kúnnen bastap «qyzyl aımaqqa» aýysty. Medısınalyq jáne farmasevtıkalyq baqylaý komıtetiniń Qaraǵandy oblysy boıynsha departamentiniń ujymy ózderi bas bolyp, jumys ornynda qaıta vaksınalaý is-sharasyn uıymdastyrdy. Bul iste olarǵa oblys ortalyǵyndaǵy №1 kópsalaly aýrýhananyń mobıldi egý toby kómektesti. Qaraǵandy oblysy boıynsha MFKD basshysy Olga Smırnova mundaı qadamǵa turǵyndarǵa úlgi kórsetý maqsatynda barǵandaryn aıtady.
– Departament ákimshiligi ótken jyldyń jeltoqsan aıynda revaksınalaýdan sátti ótken bolatyn. Al búgin búkil ujym basshylyqtyń bastamasyn qoldady. Jalpy, qyzmetkerlerimiz ótken jyly alǵashqylardyń biri bolyp ekpe alǵan edi. Endi vırýstyń jańa shtamynyń qaýpin jáne antıdenelerdiń áser etý merzimin eskere otyryp, alǵashqylardyń biri bolyp revaksınalaýdan ótti. Barlyǵymyz óz tájirıbemizde COVID-19-ǵa qarsy osyndaı aldyn alý sharasynyń tıimdiligine kóz jetkizdik. Endi ózimizdi qorǵap, jaqyndarymyzdy aýrýdyń jańa shtamdarynan qorǵaǵymyz keledi, – dedi O.Smırnova.
Qaraǵandy oblystyq sanepıdbaqylaý departamentiniń málimetine saı, shekteý sharalaryn qatańdatý «sary aımaqtan» «qyzyl aımaqqa» ótken soń, bes kúnnen keıin júrgiziletinin habarlady. Iаǵnı «sary aımaqtan» «qyzyl aımaqqa» ótý osy merzim bitkennen keıin júzege asyrylady.
Qaraǵandy oblysy