«Úzdik ǵylymı qyzmetker-2021» respýblıkalyq baıqaýynda Qaraǵandy tehnıkalyq ýnıversıtetiniń professory Arıstotel Isaǵulov jeńimpaz atandy.
Atalǵan konkýrsqa «Jaratylystaný ǵylymdary», «Injınırıng jáne tehnologııalar», «Medısına jáne densaýlyq saqtaý», «Áleýmettik jáne gýmanıtarlyq ǵylymdar», «Aýyl sharýashylyǵy jáne veterınarııa ǵylymdary», «Áskerı ǵylymdar jáne ulttyq qaýipsizdik» syndy jeti baǵyt boıynsha 575 ǵalym men ǵylymı qyzmetker qatysty.
Quramyna jetekshi ǵalymdar, táýelsiz sarapshylar, memlekettik organdardyń ókilderi, jas ǵalymdar keńesi men jas ǵalymdar alıansynyń músheleri engen komıssııanyń sheshimimen Arıstotel Isaǵulov otandyq ǵylym men tehnıkanyń damýyna eleýli úles qosqan qazaqstandyqtardy qoldaýǵa jáne kótermeleýge baǵyttalǵan syılyqqa laıyqty dep tanyldy.
Eske sala ketsek, qaraǵandylyq ǵalym byltyr ýnıversıtettegi bir top áriptesterimen birge ǵylym men tehnıka salasy boıynsha Ál-Farabı atyndaǵy Memlekettik syılyqqa ıe bolǵan edi.
Professor Arıstotel Isaǵulov 1 086 ǵylymı eńbektiń – monografııalar, ǵylymı maqalalar, patentter, oqýlyqtar jáne oqý quraldarynyń avtory. Úsh ǵylym doktoryn jáne 18 ǵylym kandıdatyn jáne 15 PhD daıarlaǵan.
Búginde «Qaraǵandy tehnıkalyq ýnıversıteti» KeAQ-tyń atqarýshy dırektory bolyp qyzmet etetin Arıstotel Isaǵulov taý-ken metallýrgııa salasyn tehnologııalyq jańǵyrtýǵa baǵyttalǵan úlken jumystardy atqaryp júr. Onyń zertteýleriniń nátıjeleri 26 kásiporynda sátti engizilgen. Olardyń qatarynda «ArselorMıttal Temirtaý» AQ, «Qazaqstan alıýmınııi» AQ, «Qaraǵandy mashına jasaý konsorsıýmy» JShS jáne «Qazaqmys» korporasııasynyń QQMZ sııaqty iri kompanııalar bar.
«Úzdik ǵylymı qyzmetker-2021» baıqaýynda ǵylymı-zertteý ınstıtýttary men joǵary oqý oryndary atynan baq synaǵan 50 ǵalymnyń marapattalǵanyn aıta ketken jón. Olardyń árqaısysyna 5 mln 834 myń teńge mólsherindegi aqshalaı syıaqy jáne arnaıy kýálik tabys etildi.
QARAǴANDY