«Astana» óńirlik qolbasshylyǵy áskerleri qolbasshysynyń basqarmasynda áskerı qyzmetshiler Qazaqstan Respýblıkasy Prezıdentiniń Joldaýyn talqylady. «Qazaqstan joly – 2050: bir maqsat, bir múdde, bir bolashaq» strategııalyq qujatynyń negizgi erejelerin túsindirý úshin Qaraǵandy garnızonyna Qorǵanys mınıstrliginiń aqparattyq-nasıhattaý toby keldi.
Qazaqstan Respýblıkasy Qarýly Kúshteri Bas shtaby bastyǵynyń orynbasary, polkovnık Muhamedjan Talasov «Astana» óńirlik qolbasshylyǵy áskerı bólimderiniń komandırlerimen, olardyń tárbıe jáne áleýmettik-quqyqtyq jumystar jónindegi orynbasarlarymen kezdesti. Sondaı-aq, atalǵan sharaǵa garnızonnyń áskerı polısııa bóliminiń bastyǵy, oblystyq áskerı-tehnıkalyq mekteptiń basshylary jáne Qaraǵandy oblysy Qorǵanys isteri jónindegi departamentiniń bastyǵy qatysty.
Komandırler áskerı qyzmetshilerdiń jas býynyna jańadan qurylǵan áskerı-tehnıkalyq mektepter men áskerı-patrıottyq tárbıe ortalyqtary arqyly patrıottyq tárbıe berý máselelerin talqylady.
– Memleket basshysy – Qazaqstan Qarýly Kúshteriniń Joǵarǵy Bas qolbasshysy halyqqa Joldaýynda Jańa Qazaqstandyq Patrıotızmniń ıdeıalyq negizin nyǵaıtýdyń mańyzdylyǵyna toqtaldy. Jalpy, qundylyqtar arqasynda biz árdaıym jeńiske jettik, elimizdi nyǵaıttyq, uly jetistikterimizdi eseledik, dep Prezıdent atap ótkendeı, bizdiń aldymyzda Otanyna shyn berilgen bolashaq ofıserlerdi tárbıeleý tapsyrmasy tur, – dedi QR QK Bas shtab bastyǵynyń orynbasary.
Qaraǵandy garnızony áskerı bólimderiniń basshylyq quramymen kezdesý barysynda Qarýly Kúshterdegi áskerı tártipti nyǵaıtý máseleleri de qaraldy.
«Egemen-aqparat».