Memleket basshysy Qasym-Jomart Toqaev Parlament Májilisiniń otyrysynda joǵary bilim máselesine arnaıy toqtaldy. Ol óz sózinde joǵary bilimniń qoljetimdiligi kókeıkesti másele retinde qalyp otyrǵanyn, halyq tyǵyz qonystanǵan óńirlerdegi jastarǵa arnalǵan maqsatty granttar bólýge aıryqsha nazar aýdarý qajet ekenin aıtty.
Jaqynda elimizde jetekshi sheteldik joǵary oqý oryndarynyń fılıaldary ashyla bastaǵan bolatyn. Endi Reseıdiń úzdik tehnıkalyq joǵary oqý oryndarynyń fılıaldaryn ashý josparlanyp otyr. Bul bizge ne úshin kerek? Jańa ekonomıka qurý úshin ýnıversıtetterdiń básekege qabilettiligin arttyrý mańyzdy. Al Prezıdent 2025 jylǵa qaraı elimizde bedeldi sheteldik joǵary oqý oryndarynyń kem degende 5 fılıalyn, onyń ekeýin tehnıkalyq baǵytta Qazaqstannyń batys óńirinde ashýdy tapsyrdy. Nege? Batys oblystarǵa sheteldik ınvestorlar jańa tehnologııalardy ákelip jatyr. Onymen bizdiń jastar jumys isteı almaı jatady. Tipti keıbir tehnıkalardyń tilin biletin mamandar tapshylyǵy baıqalady. Otandyq oqý oryndarynyń ondaı qural-jabdyqtary joq. Soǵan baılanysty sheteldik bazasy myqty qalyptasqan ýnıversıtet Qazaqstanda fılıalyn ashsa, jastarǵa jańa múmkindik týady.
Negizinen fılıalyn ashatyn ýnıversıtettiń bedeline qaraǵan durys. Degenmen ondaǵy mamandyqtarǵa da mán bergen jón. Sebebi shetelden nemese halyqaralyq ýnıversıtetten suranysta joq mamandyqty oqyp alyp, jumyssyz júrgen jastar jeterlik. Sondyqtan aldymen sol fılıal ashatyn óńirge qajetti, qazir tapshy bolyp turǵan mamandyqtardy zerdeleý qajet. Sodan soń baryp sol mamandyqtarǵa qandaı sheteldik ýnıversıtet daıarlaıtynyn bilý kerek. Munymen endi ýnıversıtetter jiti aınalysqany abzal.
Rahman ALShANOV,
Joǵary oqý oryndary
qaýymdastyǵynyń tóraǵasy