Qazaqstannyń depozıtterge kepildik berý qory (QDKBQ) jınaq depozıtter boıynsha kepildik berilgen maksımaldy somanyń 20 mln teńgege deıin ulǵaıǵanyn málimdedi. 2021 jyldyń 30 jeltoqsanynda Qazaqstan Prezıdenti Qasym-Jomart Toqaev teńgedegi jınaq salymdar boıynsha kepildik berilgen ótemniń maksımaldy mólsherin 15 mln teńgeden 20 mln teńgege deıin ulǵaıtýdy kózdeıtin zańǵa qol qoıǵan edi.
Tıisti ózgerister «Qazaqstan Respýblıkasynyń ekinshi deńgeıdegi bankterinde ornalastyrylǵan depozıtterge mindetti kepildik berý týraly» Zańyna engizildi jáne 2022 jyldyń 11 qańtarynan bastap kúshine enedi. Jańa ózgeristerge sáıkes bir bankte túri men valıýtasyna qaraı jınaq salymy jáne basqa da depozıtteri bar salymshylar úshin QDKBQ-nyń jıyntyq kepildik berilgen maksımaldy somasy da ósedi. Bul jaǵdaıda jıyntyq kepildik berilgen maksımaldy soma 20 mln teńgeni quraıdy.
«Kepildik berilgen maksımaldy somanyń ósýine baılanysty QDKBQ salymshylardyń da, memlekettik bıýdjettiń de shyǵynǵa ushyramaıtyndyǵyn atap ótedi: ótem somasy jınaqtaý negizinde qalyptasatyn arnaıy rezervtiń qarajaty esebinen júzege asyrylatyn bolady. Qazirgi ýaqytta jınaqtalǵan arnaıy rezervtiń kólemi QDKBQ jarǵylyq kapıtalynyń 70 paıyzyn esepke ala otyryp, 847 mlrd teńgeni quraıdy. Arnaıy rezervtiń bul deńgeıi zańnamalyq turǵyda bekitilgen 5 paıyzdyq mejeden joǵary jáne úzdik álemdik tájirıbelerge sáıkes keledi» delingen qor habarlamasynda.
Eske salaıyq, elimizde ıslam bankterinen basqa, jeke tulǵalardyń depozıtterin qabyldaýǵa jáne júrgizýge lısenzııa alǵan barlyq bankter mindetti túrde depozıtterge kepildik berý júıesine qatysady. Osylaısha, barsha qazaqstandyqtardyń ekinshi deńgeıli bankterdegi aqshalary joǵaryda kórsetilgen lımıtter sheginde QDKBQ qorǵaýyna alynady.
10 qańtar kúni qor qarjy júıesiniń turaqtylyǵyn qamtamasyz etý boıynsha Memleket basshysynyń tapsyrmasyn oryndaý úshin jeke tulǵalardyń ulttyq valıýtadaǵy depozıtteriniń jekelegen túrleri boıynsha eń joǵary syıaqy mólsherlemesin kóterý týraly sheshim qabyldady. 2022 jyldyń 11 qańtarynan bastap standartty óteý merzimi 3 jáne 6 aı jınaq salymdary boıynsha eń joǵary syıaqy mólsherlemesi 2 paıyzǵa, al 12 aı standartty óteý merzimi bar jınaq salymdary boıynsha 1 paıyzǵa kóbeıdi.