Indet qaıta etek ala bastaǵan Qostanaı oblysy da «sary aımaqqa» kóship, shekteý sharalaryn kúsheıtti. Oblystyq densaýlyq saqtaý departamenti 10 qańtarda 3 adam COVID-19 juqtyrdy dep málimet berip edi, bul kórsetkish aınaldyrǵan 6 kúnniń ishinde júzdiń ústine bir-aq shyqty.
Oblystyń bas sanıtarlyq dárigeri jarııa etken jańa qaýlyǵa sáıkes, budan bylaı toı-tomalaqtar men forým, konferensııa sııaqty kópshilik sharalardy uıymdastyrýǵa tyıym salyndy. Tek marqumdardyń rýhyna duǵa baǵyshtap, as berýge ǵana ruqsat bar. Ashyq qosymshasy ornatylǵan qoǵamdyq tamaqtaný oryndarynda ótýi tıis mundaı sharalarǵa ári ketkende 30 adam ǵana qatysa alady.
COVID-19-ǵa qarsy vaksına qabyldaǵan-qabyldamaǵanyna qaramastan, memlekettik mekeme qyzmetkerleriniń kem degende 80 paıyzy qashyqtan jumys isteýge kóshti.
Oblystyń bas sanıtarlyq dárigeri Ermuhanbet Dáýletbaevtyń aıtýynsha, el ishinde ujymdyq ımmýnıtet tolyq qalyptasty deýge áli erte.
– «Omıkronnyń» juǵý jyldamdyǵy «Delta» shtamyna qaraǵanda 5 ese joǵary. Betperdesiz adamnyń qasynda bes mınýt turǵan adamnyń ózi qaýipti indetti juqtyryp alýy múmkin. Koronavırýs ınfeksııasynyń basqa túrlerindeı emes, «Omıkron» 20-30 jas aralyǵyndaǵy adamdarǵa kóbirek juǵady. Sońǵy kezderi turǵyndardyń deni qoǵamdyq oryndarda saqtanyp júrýdi umytyp, tártipke salǵyrt qaraı bastady. Nátıjesinde, vırýsty qaıta juqtyryp alǵan naýqastar qatary kóbeıýde, – dedi E.Dáýletbaev.
Sonymen qatar mektep oqýshylary 31 qańtarǵa deıin, al joǵary oqý oryndary men kolledj stýdentteri 6 aqpanǵa deıin onlaın rejimde oqıtyn bolady.
Qostanaı oblysy