Qazaqstan halqy Assambleıasy uıymdastyrǵan dóńgelek ústelge qatysýshylar Parlament Májilisiniń otyrysynda aıtylǵan Prezıdenttiń bastamalaryna qoldaý bildirip, sonymen qatar «Qazaqstan halqyna» qoryn qurýǵa jan-jaqty atsalysatynyn málimdedi.
Is-sharaǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi Marat Ázilhanov, Parlament Májilisiniń QHA depýtattyq tobynyń músheleri, QHA qoǵamdyq qurylymdarynyń jáne etnomádenı birlestikterdiń basshylary, memlekettik organdar men BAQ ókilderi qatysty.
Jıynnyń basynda M.Ázilhanov Qazaqstan halqy Assambleıasy eldegi oryn alǵan qaıǵyly oqıǵanyń saldaryn joıýǵa belsendi atsalysyp jatqanyn atap ótti. «Qasiretti qańtar» kúnderi Assambleıanyń barlyq múshesi is júzinde elimizdiń birligi men tutastyǵyna beıimdiligin kórsetti, elimizde oryn alǵan terrorıstik aksııalardyń, buzaqylyqpen tonaýdyń jolyn kesýge baǵyttalǵan Memleket basshysynyń batyl sharalaryn qoldap, qalypty ómirdi qalpyna keltirýge belsene atsalysýda. Barlyǵymyzǵa tatýlyq, birlik, kelisim, azamattyq beıbitshilik pen turaqtylyq degen sózder kúndelikti ómirimizdiń irgeli negizi men basty qundylyqtary ekendigi aıqyndaldy», dedi Marat Ázilhanov.
Onyń aıtýynsha, Qazaqstan Prezıdenti Qasym-Jomart Toqaevtyń Májilis otyrysynda sóılegen baǵdarlamalyq sózi qańtar daǵdarysynyń betburysty kezeńin aıqyndady. «Jańa Qazaqstan – bul qoǵamdyq qundylyqtardy tereń boılaý, qoǵamdaǵy áleýmettik jáne basqa da olqylyqtardy eńserý, bul bizdiń birligimizdiń jańa sapasy, elıtanyń moraldyq kodeksi, memlekettik apparattyń jańarýy, ómirimizdiń gýmanıtarlyq adamı ólshemi jáne adamı kapıtalǵa den qoıý», dep atap ótti QHA Tóraǵasynyń orynbasary.
M.Ázilhanov «Qazaqstan halqyna» qoryn ashýdyń mańyzdylyǵyna erekshe nazar aýdardy. «Qazaqstan halqy Assambleıasy birinshi kezekte osy qordyń jumysyna járdemdesýi tıis. О́ıtkeni bul jaı ǵana qaıyrymdylyq uıymy emes – bul bizdiń ortaq áleýmettik jaýapkershiligimizdiń jalpyulttyq ınstıtýty», dedi spıker.
Otyrys barysynda qatysýshylar aldaǵy atqarylatyn jumys boıynsha óz usynystarymen bólisip, Assambleıanyń barlyq múshesin Prezıdent belgilegen jańa mindetterdi qoldaýǵa shaqyrdy.
Atap aıtqanda, QHA bastamasymen barlyq óńirde birqatar is-shara uıymdastyrý usynyldy. Olardyń qatarynda qıraǵan ǵımarattar men nysandardy qalpyna keltirý boıynsha volonterlik jáne qaıyrymdylyq aksııalary, muqtaj jandarǵa, ásirese, zardap shekken áskerı jáne polısııa qyzmetkerleriniń otbasylaryna kómek kórsetý, «Qazaqstan halqyna» qory jumysynyń maqsattary men mindetterin túsindirý boıynsha QHA múshelerimen jáne mesenattarmen jınalystar uıymdastyrý josparlanǵan. Tóraǵa orynbasary qańtar aıynyń basynda ınternetke qosylý qıyndyq týdyrsa da birqatar túsindirý jumysy júrgizilgenin málimdedi.
Osy rette, 2022 jyl Balalar jyly bolyp jarııalanǵanyn eskere otyryp, QHA-nyń jekelegen jobalary kózdelgen maqsattarǵa sáıkes qaıta qaralatyndyǵy aıtyldy, olardy iske asyrýmen respýblıka aımaqtarynda Analar keńesi jáne QHA qurylymdarymen birlesip aınalysady.