Kúntizbeni qanmen aıǵyzdaǵan qańtar qyrǵyny el tarıhyndaǵy eń bir aýyr qasiret retinde tańbalandy. Beıbit tańda Otan qorǵaýshylar men qarapaıym turǵyndar qaza bolyp, talaı oshaqtyń oty sóndi.
Tutas ult aza tutqan tumandy kún birtindep seıiler. Qıraǵan qala qalpyna kelip, qalypty ómir qaıta jalǵasar. Anany balasynan, sábıdi ákesinen, jardy azamatynan aıyrǵan alapat qyrǵyndy eshbir aqtaýǵa kelmeıdi. Týǵan qalasyn jaý japyrǵandaı qıratyp, taban astyndaǵy tas tósemderge deıin talqandaǵan tasbaýyrlar men oıda joq oıranǵa ot qoıǵandar zańǵa saı jazalanar. Qymbatshylyqtyń qyspaǵyn aıtyp, beıbit sherýge shyqqandardyń kóleńkesinde jymysqy oıyn júzege asyrǵysy kelgen sodyrlarǵa esh aıaýshylyq bolmaıtynyn Memleket basshysy qadap aıtty. Osy tusta Prezıdent sóz etken taǵy bir dúnıe, quqyq qorǵaý oryndarynyń tergeý kezinde istiń aq-qarasyn ádil tarazylaýy. Bul jaıt qalyń buqarany da alańdatyp otyr.
Tirshilik arnasyna túsip lańkesterge qarsy is-qımyl beleń alǵan tusta kúnine júzdegen, myńdaǵan adam qolǵa túsip jaýapqa tartylýda. Sýyq qarýlar men tonalǵan tehnıkalar tárkilenip, beıbereketsizdik týdyryp, beınebaqylaýǵa túskender qylmystyq bapqa saı tergeýge alynyp jatyr. Oqıǵa oshaǵyna aınalǵan bir ǵana Almatyda kúni búginge deıin birneshe myń adam tutqynǵa alynǵan. Bul sandar sát saıyn ósýde.
Kóptegen áleýmettik jeli qoldanýshylary óz jazbalarynda tergeý-tekserý jumystarynyń ádil ótýin suraǵan. Birqatar sarapshylar da bul pikirdi qýattap «aıran ishken qutylyp, túbin jalaǵandar tutylmasa», deıdi. Álbette, mundaı qysyltaıań sátte árkim jeke basy men óz jaqyndaryn arashalap alýǵa tyrysar. Dese de atalǵan jerde kezdeısoq ketip bara jatyp qolǵa túsken jazyqsyz janǵa aýyr aıyp taǵylyp ketpese degen alań bar.
– Menen sabaq alyp júrgen Bek Sarbasov degen ańqaý, ańqyldaǵan bilimdi azamat bar. 5 qańtar kúni Almatydaǵy «Baýyrsaq» dep atalatyn dámhanada Esenbol esimdi naǵashy aǵasymen birge tamaqtanyp otyrǵanda, mıtıng jasaǵan top sol mańaıǵa kelip qalǵan eken. Úreılengen kafe ıeleri barlyq qonaqtardyń dalaǵa shyǵýyn surap, ǵımaratty bosatýyn ótingen. Bek te kópshilikpen birge syrtqa shyǵyp, amalsyz mıtıng jasap jatqan adamdardyń arasymen kóshe boılap kele jatqanda, polıseıler qýalaıdy. Abdyrap qalǵan Bek te kópshilikpen birge qasha jóneledi. Kenet jol jıegindegi aryqqa qulap, aıaǵyn syndyryp alady. Jedel járdemmen aýrýhanaǵa jetip, sonda jatyp ota jasatady. Buǵan deıin onymen habarlasyp otyrǵan edik. Eki kúnnen beri polısııa alyp ketip, taba almaı otyrmyz. О́zi týmysynan ańqaý jigitke uryp-soǵyp bir qylmysty ilip jibermese dep alańdaımyz. Bek bireýdi uryp, soqpaq turmaq bireýdiń betine qarap sóz aıtatyn emes, bireýdiń zatyn almaq túgili óz dúnıesin elge berip qoıyp, qaıtyp suraýǵa bata almaı júretin azamat. Quqyq qorǵaý mekemelerinde jumys isteıtin azamattar barynsha ádil bolyp, jazyqsyz jandar jábirlenbese deımiz. Árkimniń de ósip kele jatqan bala-shaǵasy bar ǵoı, – deıdi áleýmettik jeli arqyly oıyn jetkizgen kásipker A.Nursıla.
Qazaqstan Jazýshylar odaǵy basqarma tóraǵasynyń birinshi orynbasary, aqyn Aqberen Elgezek te biz qaýzap otyrǵan jaıǵa qatysty pikir bildirdi. «Bolary bolyp, boıaýy sińbegen kezeńde otyrmyz. «Bireý qyz alyp qashypty, bireý bosqa qashypty» degen de bizdiń sóz. Menińshe, sol turǵyda qaraý kerek. Oqıǵaǵa qatysýshy zańdy buzyp, qylmysy dáleldense, ol aıypty. Biraq ár qylmystyń ózine saı jazasy bolady. Talaı jaýyngerden, polısııa jáne qaýipsizdik qyzmetiniń qanshama ofıserinen, beıbit turǵyndardan, kip-kishkentaı balalardan aıyryldyq. Olardyń ornyn eshkim toltyra almaıdy. Ásirese, ata-ana úshin. Solardyń ólimine naqty qatysy barlardy aıaýsyz, qatań jazalaý kerek! Oǵan daý joq! Alaıda bireýdiń aýyr qylmysyn, ıa bolmasa buryndary ashylmaı jatqan qylmystardy jas jigitterimizdiń moınyna ile salý bolmasyn. Árqaısysynyń qylmysyn naqty anyqtap, isti ádil júrgizý úlken jaýapkershilik. Sondyqtan bizdiń tergeýshiler, ózge de quqyq qorǵaýshy mamandar isti ashý ústinde áriptesimniń óshin alam dep, bolmasa isti tezirek bitirem dep naýqanshyldyqqa salynyp, bireýdiń aýyr qylmysyn naqaqtan-naqaq jaba salýǵa jol bermeńizder», deıdi Aqberen Elgezek.
Basqa da osy saryndas ótinish-tilekter men oı-pikirler qoǵam belsendileri tarapynan aýyq-aýyq aıtylyp jatyr. Mundaı jaımen betpe-bet kelgen qarapaıym oqyrmandar da jeli arqyly óz únin bildirýde. Álbette olardyń bárin aqtap, baǵa berýden aýlaqpyz. Quzyrly oryndar ár istiń aq-qarasyn anyqtap, ádil tarazylaı jatar. Sóz joq, kórseqyzarlyǵy ustap dúken tonaǵandardyń, beıbit túrde kóppen birge azamattyq únin bildirgenderdiń, qolyna qarý alyp adam qanyn júktegenderdiń arajigi jer men kókteı...
ALMATY