Memleket basshysy Nursultan Nazarbaev S.Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaevty qabyldady, dep habarlady Prezıdenttiń baspasóz qyzmeti.
Kezdesý barysynda otandyq agrarlyq ǵylymnyń jaı-kúıi, sondaı-aq, ony odan ári damytýdyń ózekti máseleleri talqylandy. A.Kúrishbaev ýnıversıtettiń sońǵy jyldary qol jetkizgen jetistikteri jáne joǵary oqý orny arqaýynda halyqaralyq agrarlyq zertteý ýnıversıtetin qurý jónindegi Memleket basshysy tapsyrmasynyń iske asyrylýy týraly baıandady.
Nursultan Nazarbaev Qazaqstanda jetkilikti kólemde jer jáne adam resýrstary bar ekenine qaramastan, elimizde aýyl sharýashylyǵy salasy tıisti qarqynda damymaı otyrǵanyn aıtty.
– Biz aýa raıy qolaıly, jaýyn-shashyn qajetti mólsherde bolǵanda ǵana mol astyq jınaımyz. Árıne, aýyl sharýashylyǵynda ónimdilik burynǵy jyldarmen salystyrǵanda, aıtarlyqtaı artty, biraq áli de bul baǵytta belsene jumys júrgizý mindeti tur. Memleket osy mindettiń oryndalýyna edáýir resýrstar bólýde, – dedi Qazaqstan Prezıdenti.
Memleket basshysy agroónerkásip kesheninde synnan ótken álemdik tehnologııalardy paıdalanǵan jón ekenin, olardy Qazaqstan jaǵdaıyn eskere otyryp engizý qajettigin aıtty.
– Agroónerkásip keshenin damytý salasynda jumysty kóptegen ǵylymı-zertteý ınstıtýttarymen birge, «QazAgroInnovasııa» júrgizýde jáne memleket onyń jumys isteýi úshin jyl saıyn aıtarlyqtaı qarajat bólip keledi. Alaıda, osynaý zertteý qurylymdary men fermerler arasynda tıisti deńgeıdegi ózara is-qımyl joq, – dedi Nursultan Nazarbaev.
Kezdesý barysynda A.Kúrishbaev agrarlyq zertteý ýnıversıtetin qurý tujyrymdamasyn ázirleý jónindegi jumys, basqarý júıesi men bilim berý úderisin reformalaýdyń bastalǵany týraly habarlady. Buǵan qosa, shetelderdiń jetekshi ýnıversıtetterimen jáne ǵylymı ortalyqtarymen yntymaqtastyq ornap, qanatqaqty halyqaralyq zertteý baǵdarlamalary daıyndaldy.
Kezdesý qorytyndysynda Memleket basshysy qaralǵan máseleler boıynsha birqatar naqty tapsyrmalar berdi.
Sýretti túsirgender
S.BONDARENKO, B.OTARBAEV.