Keshe Astanada abaısyzda Esildegi muzdyń astyna túsip ketken eki bala qutqaryldy. Aǵaıyndy Aldabergen jáne Qudaıbergen Bektanovtar saǵat 11:00 shamasynda «Alataý» sport kesheninde ótken dzıýdo jattyǵýynan shyqqan eken.
Eki bala oınap kele jatyp Esil ózenine syrǵanaı jóneledi. Sol boıy oıylǵan muzdyń astyna kúmp beredi. Olardyń kómekke shaqyryp úlgergen daýystaryn estip qalǵan eki jas jigit birden ózen arnasyna qaraı qustaı ushady. Olar sýǵa batyp bara jatqan balalardy syrtqa tartyp alady. Al aǵaıyndy balaqaılardy ajaldyń tyrnaǵynan aman alyp qalǵan Maqsat Beıisov pen Doshan Musa-Namaz Ishki ister mınıstrligi Úkimettik mekemelerdi kúzetý jónindegi polısııa polkiniń qyzmetkerleri bolyp shyqty.
Sýǵa ketip qala jazdaǵan balalarǵa sosyn «Alataý» kesheninde alǵashqy kómek kórsetilgen. «Dárigerler bizge de kómektesti. Eki balanyń jaǵdaıy qazir jaqsy. Áke-sheshesi keldi. Bári oıdaǵydaı», dedi qutqarýshylar.
Balalardyń ákesi Tolqyn Bektanovtyń aıtýynsha, jumysta júrgeninde jattyqtyrýshylar habarlasyp, balalardyń sýǵa túsip ketkenin jetkizgen. Oqıǵa ornyna birden jetken ol balalaryn qutqaryp alǵan jigitterge alǵysyn jaýdyrdy.
Rýslan IGILIK.