Daıyndyq ulttyq aýqymdaǵy sıpatqa ıe

Budan buryn habar­­la­ǵa­ny­myzdaı, Halyq­aralyq kór­me­ler bıý­rosynyń Bas hatshysy Vısente Gonsales Los­sertales Astanaǵa jumys saparymen kelgen bolatyn. Keshe Ortalyq kom­mýnıka­sııalar qyz­metinde Bas hatshy brıfıng ótkizdi. Oǵan sonymen birge, EKSPO-2017 halyqaralyq mamandandyrylǵan kórmesiniń komıssary, Syrtqy ister mı­nıs­triniń birinshi orynbasary Rápil Joshybaev jáne «Astana EKSPO-2017» UK» AQ basqarma tór­aǵa­sy Talǵat Ermegııaev qa­tysty. Brıfıngti kirispe sózben ashqan Rápil Joshybaev Halyqaralyq kórmeler bıýrosynyń (HKB) Bas hatshysyna osy ýaqytqa deıin Astanada Halyqaralyq kór­meni ótkizýge daıyndyq barysynda kór­setken kómegi úshin al­ǵys aıtty. Sonymen birge, ol bıyl­ǵy jylǵy maýsym aıynda óte­tin HKB Bas assambleıasynyń 155-ses­sııasynda Qazaqstanǵa EKSPO kór­mesin ótkizýge quqyq be­retin Ha­lyq­aralyq kórmeler bıýro­synyń Týy tapsyrylatynyn, so­dan keıin elimiz kórmege qaty­satyn elderdi shaqyrýmen tikeleı aınalysatyndyǵyn atap kórsetti. О́z kezeginde sóz alǵan HKB Bas hatshysy Vısente Lossertales Qazaqstanǵa kelgen jumys sapary barysynda Premer-Mınıstr Serik Ahmetovpen, Qorshaǵan orta jáne sý resýrstary mınıstri Nurlan Qapparovpen, Astana qalasynyń ákimi Imanǵalı Tas­ma­ǵambetovpen, Halyqaralyq ma­mandandyrylǵan kórmeniń komıssary Rápil Joshybaevpen, «Astana EKSPO-2017» UK» AQ basqarma tóraǵasy Talǵat Er­megııaevpen nátıjeli kezdesýler ótkizgenin atap kórsetti. Odan ári ol «Astana EKSPO-2017» shyn má­ninde Qazaqstannyń ulttyq jobasyna aınalǵandyǵyn aıtty. Búkilálemdik mamandandyrylǵan kórmege daıyndyq barysynda Astanada júzege asyrýǵa bel­­gilengen sharalar ulttyq aýqym­da sıpat alýda. Bul kór­meniń postkeńestik keńistikte ótkizilgeli otyrǵan halyqaralyq aý­qymdaǵy osyndaı birinshi kór­me ekendigin atap kórsetip, osy­ǵan sáıkes jú­ze­ge asyrylatyn bir­qatar tehnı­kalyq sıpattaǵy má­selelerdi tilge tıek etti. EKSPO – belgilengen úsh aı merzimde ótkizilip, sonymen oǵan qatysty máselelerdiń barlyǵy bite salatyn shara emes. Bul eldiń erteńgi damýyna túbegeıli áser etetin mańyzdy másele. Ekinshi bir atap kórsetetin jaı, EKSPO-nyń barlyq elementteri bel­gi­lengen sheberlik josparda jáne arhı­tektýralyq sheshimderde kóri­nis tabýy kerek. Olardyń úıle­simdiligi óte kúrdeli másele. Osy­ǵan baılanysty atqarylatyn ister de aýqymdy. Kórme qalashyǵynyń tu­ǵyry bolyp sanalatyn qazaq­stan­dyq pavılon, bul tek qana «Bo­lashaqtyń energııasy» kóri­nis ta­batyn taqyryptyq pavılon ǵana emes, sonymen birge ol Qa­zaqstannyń tarıhyn, máde­nıetin jáne ulttyq salt-dástúr­lerin pash etetin ortalyq. Ende­she Qazaqstan pavılonynyń qu­ry­lysy, arhıtektýralyq sheshi­mi osyndaı aýqymdy da joǵa­ry talaptarǵa saı bolýy tıis. Bas hatshy óz sózinde EKSPO kór­mesin ótkizýge daıyndyq bary­synda Astana qalasynda jú­zege asyrylyp jatqan ınje­ner­lik-kommýnıkasııalyq ın­fra­qurylymdyq sheshimderge dán rıza ekendigin atap kórsetti. So­nymen birge, HKB Bas hatshysy EKSPO-2017 Halyqaralyq ma­man­dandyrylǵan kórmesin ótki­zýge daıyndyq barysyndaǵy ke­zeń jáne ony oıdaǵydaı ótki­zý Qazaqstan úshin ınvestısııa tartýdyń mol múmkindigi eken­digin tilge tıek etti. «Men EKSPO-2017 kórmesiniń Qazaq­stan Respýblıkasy úshin bola­shaq damýdyń katalızatory bola­tyndyǵyna senimdimin», dedi óz sózinde Vısente Lossertales. «Astana EKSPO-2017» UK» AQ-tyń basqarma tóraǵasy Talǵat Ermegııaev óz sózinde Qa­zaq­stan pavılonyn salý, kór­me qalashyǵyndaǵy etnoaýyl qu­rylysy máselelerin tilge tıek etti. EKSPO-2017 kórme qala­shy­ǵyna bólingen 174 gektar aýmaq­ta mamyr aıynan bastap qury­lys jumystary júrgizile bas­taıdy. Tóraǵanyń aıtýy boıynsha, Úkimet ınjenerlik-kommýnıkasııalyq júıelerdi jáne Qazaqstan pavılonyn salýǵa ǵana qarjy jumsaýy kerek. Al kórme qalashyǵyndaǵy qonaq úıler, saýda ortalyqtary jáne basqa nysandardy salýǵa ınvestısııalar men jeke ınves­torlar tartylýy kerek. Sonymen birge, «Astana EKSPO-2017» UK» AQ basqarma tóraǵasy Talǵat Ermegııaev jýrnalıster tarapynan qoıylǵan suraqtarǵa jaýap bere kelip, kórme qalashyǵynyń qurylysyn salýǵa bir ǵana bas merdiger uıym azdyq etetinin atap kórsetti. Kórme qalashyǵyndaǵy 1 mıllıon 300 myń sharshy metr qurylys kólemin ıgerýge bir bas merdigerdiń shamasy jetpeıdi. Sondyqtan kórme qalashyǵynyń qurylys alańynda keminde 3-4 bas merdiger uıym bolmaq. EKSPO-2017 Halyqaralyq mamandandyrylǵan kórmesiniń komıssary Rápil Joshybaev «Maýsym aıynda kórme Týyn alǵannan keıin elimiz kórmege qatysatyn elderdi shaqyra bastaıdy. Birinshi kezekte, HKB-ǵa múshe memleketterge shaqyrý jiberiledi. Sonymen birge, HKB-ǵa múshe emes AQSh, Úndistan sııaqty memleketter de bar. Olar kórmege qatysýǵa nıet bildirýde. Sondyqtan biz olarǵa da shaqyrý joldaıtyn bolamyz», dedi. Sondaı-aq, Rápil Joshybaev Qazaqstanda taıaý bolashaqta damyǵan 50 memleket­pen vızasyz rejim tártibin engizýge daıyndyq jasalyp jatqandyǵyn aıtty. Brıfıng barysynda oǵan qatysýshylar jýrnalıster tara­pynan qoıylǵan kóptegen su­raqtarǵa jaýap berdi. Jylqybaı JAǴYPARULY, «Egemen Qazaqstan».