Buǵan deıin Pavlodar oblysy Aqsý aýdanynda 14 jasar oqýshy qyz Nastıa Sharıpovany óltirgenin rastap qoıǵan Vıktor Baharev taǵy da bul moıyndaýdan bas tartty. Bul týraly Remarka.kz tilshisine sottalýshynyń ápkesi Antonına Zvereva málimdedi.
Pavlodar qalalyq sotynda Evgenevka selosynyń turǵyny Anastasııa Sharıpovany zorlap, óltirdi degen aıyp taǵylǵan osy selonyń taǵy bir turǵyny Vıktor Baharevtiń isin jabyq rejımde qaraǵan sot májilisi odan ári jalǵasyp jatyr. Sottalýshynyń ápkesi A.Zverevanyń aıtýynsha, Vıktor sotta taǵy da óziniń buryn bergen kórsetýlerinen bas tartqan. Buǵan ol tergeý kezinde ózine quqyq qorǵaý organdary qyzmetkerleriniń qysym kórsetkenimen túsindirdi. Budan basqa, sottalýshynyń advokaty Baýyrjan Azanovtyń málimetinshe, qorǵaýshy jaǵy taǵy da sýdıadan bas tartatynyn sotqa jazbasha túrde tapsyrǵan. Ol muny alqabılerdi tańdaýda aıtarlyqtaı tártip buzýshylyqtardyń oryn alǵanymen baılanystyrdy.
Eske sala keteıik, Nastıa Sharıpova 2013 jylǵy 21 qazan kúni mektepten shyǵyp, 500 metr jerdegi úıine bara jatqan jolda úshti-kúıli joǵalyp ketken. Onyń máıiti tek arada eki apta ótkennen keıin kezdeısoq tabyldy. Osy ýaqytqa deıin bul mańaıdy túgel sharlap shyqqan polıseıler men aýyldastar ony kórmegen edi. Sońynda bul istiń birden-bir kúdiktisi retinde qyzdyń 20 jasar kórshisi Vıktor Baharev ustaldy. Ol qamaýǵa alynǵan boıda bul qylmysty óziniń jasaǵynan moıyndap shyqty. Keıin muny sot-medısınalyq saraptamasy rastap bergennen keıin de qaza tapqan qyzdyń ata-anasy qylmysty Vıktordyń jasaǵanyna senbeı qoıdy. Soǵan qaramastan, olar ózderine qaıǵy jamyldyrǵan selodan sol kezde shuǵyl kóship ketti. Qorǵaýshylar jaǵy bolsa, Vıktordyń buryn bergen kórsetýlerinen bas tartatyny týraly tapsyrys berip, sottyń quramyn ózgertýdi talap etti. Alaıda, bul kepildemeni de, sot prosesin elimizdiń basqa aımaǵynda ótkizý jónindegi ótinishti de joǵary ınstansııa qabyl almady.
Qurysh Nurymbet.
Mánbe: Remarka.kz.