Búgin, 15 naýryz kúni fýtboldan Qazaqstan premer-lıgasy chempıonatynyń birinshi týry oınaldy. Ol Almatyda jergilikti «Qaırat» jáne «Atyraý» komandalary arasyndaǵy oıynmen aıaqtaldy. Bul týraly Egemen.kz habarlady.
Kezdesý 1:0 esebimen qonaqtardyń paıdasyna sheshildi. Matchtaǵy jalǵyz goldy 31-mınýtta Ýgandadan shyqqan 24 jasar germanııalyq fýtbolshy Savıo Nsereko saldy. Ekinshi taımda Vladımır Vaısstyń jigitteri oıyn tizginin qoldaryna aldy. Biraq múmkindikterin júzege asyra alǵan joq. Buǵan kerisinshe qaqpashy Andreı Shabanovtyń senimdi oıynyna arqa súıegen atyraýlyqtar alań ıeleriniń ekpinderin udaıy basyp otyrdy.
Osylaısha «Qaırat» qatarynan ekinshi jyl óz alańyndaǵy starttyq oıynda jeńiske jete almady.
Budan buryn Qostanaıdyń «Tobyly» óz alańynda Semeıdiń «Spartagyn» 2:1 etip utsa, Pavlodarda «Ertis» Qaraǵandynyń «Shahterin» 1:0 esebimen jeńdi. Al Tarazda jergilikti komandany «Aqtóbe» 2:0 etip tize búktirse, Qyzylordada «Qaısar» Shymkenttiń «Ordabasy» ujymynan 1:0 esebimen basym tústi. Al Astanada elorda attas komanda men Taldyqorǵannyń «Jetisý» ujymdary arasyndaǵy oıynda esep ashylmady.
Taǵy bir derek, chempıonat bastalar aldynda ǵana «Ertistiń» tizginin Tarmo Rıýıýtlı esimdi eston mamany ustaǵan edi. Ol 1954 jyly týǵan. Jattyqtyrýshylyq tájirıbesi jetkilikti. Buǵan deıin Estonııanyń «Týlevık» (Vılıandı), «Flora» (Tallın), «Levadııa» (Tallın), «Kalev» (Tallın) sekildi komandalaryn jattyqtyrǵan. Taǵy 6 jyl eldiń ulttyq quramasynyń bas bapkeri bolǵan.
Damır Qojamqul.
Derekkóz: Egemen.kz.
Foto: Vesti.kz.