Ústimizdegi jylǵy naýryzdyń 7-nen 8-ne qaraǵan túni Kýala-Lýmpýrdan ushyp shyqqanyna eki saǵattaı bolǵan kezde dıspetcher radarynan joq bolyp ketken Boeing 777-200 ushaǵy ekıpajdyń nemese jolaýshylardyń biriniń erkimen alǵan baǵytynan bas tartyp, basqa jaqqa qaraı burylyp ketken bolýy ábden múmkin. Bul týraly Malaızııa premer-mınıstri Nadjıb Razak málimdemesine silteme jasaǵan QazTAG habarlady.
«Biz ushaq bortynan jerge málimet berip turatyn júıeniń (ACARS) sanaly túrde ajyratylyp tastalǵanyn óte joǵary senimmen aıta alamyz. Mundaı áreketti borttaǵy áldekimderdiń aldyn ala josparlaryna saı ǵana jasaýy múmkin», - dedi senbi kúni arnaıy ótkizgen premer.
Úkimet basshysy ázirge zertteý jumystarynyń júrip jatqanyna salmaq salyp, áýe kemesiniń urlanyp ketkeni týraly tujyrymdy pikir aıtqan joq.
Spýtnık jáne áskerı radarlardyń málimetteri boıynsha, 370-reıs shynynda aıtylǵan ýaqytta kilt burylyp, baǵytyn batys jaqqa qaraı túzegen. Shynynda tap osyndaı aqpar taraǵany ras. Biraq Malaızııa bıligi kúni keshege ony moıyndaǵan joq edi. Endi premer-mınıstr ushaqty izdestirý jumystarynyń osy baǵytta eki boljam boıynsha júrgiziletinin aıtty. Olardyń birinshisi Taılandtan Qazaqstanǵa deıingi aralyqty qamtysa, ekinshisi Indonezııadan Úndi muhıtynyń ońtústik bóligine deıin sozylady.
Eske sala keteıik, Malaızııa áýe kompanııasynyń bortynda 227 jolaýshysy jáne 12 ekıpaj múshesi bar Boeing 777-200 ushaǵy Kýala-Lýmpýrdan Beıjińge ushyp shyqqanyna shamamen eki saǵat ótkende kenetten joq bolyp ketken edi. Bul kezde ol Ońtústik Qytaı teńizi ústinde, Malaızııanyń Kota-Barý qalasynan 120 mıl jerde, Vetnamnyń ońtústik jaǵalaýyna jaqyn mańda ushyp bara jatqan bolatyn.
Murat Aıtqoja.
Derekkóz: QazTAG.
Foto: Kapital.kz/