Esimi Túrkistan oblysynyń sport jankúıerlerine etene tanys bapker Orynbasar Pashımov 70-ten asqan shaǵynda dúnıeden ótti, dep habarlaıdy Egemen.kz.
Orynbasar Merqululy 1951 jyly Maqtaaral aýdany qazirgi Atakent aýylynda dúnıege kelgen. Es bilgeli sportqa jaqyn bolyp ósti. О́se kele ol ózin sportshy emes, voleıbol bapkeri retinde synap kórdi. Ol balalarmen tez til tabysyp, nátıjeli dıalog ornata biletin. Árbir shákirtiniń jan dúnıesine tereń úńildi. Maqtaaral aýdanynda voleıbol sportyn tynymsyz eńbeginiń arqasynda jańa beleske shyǵardy. Onyń jetekshiligimen aýdannan qazaq elin tamsandyrǵan talaı talantty voleıbolshy qyzdar shyqty. Úzdik oıynshylary ulttyq qurama komandasynyń sapynda halyqaralyq dúbirli dodalarda Qazaqstannyń namysyn qorǵap, jasyndaı jarqyldady.
Orynbasar Pashımovtyń múmkindigi men qabiletin joǵary baǵalaǵan basshylyq aýdandyq sport mektebiniń dırektory etip taǵaıyndaıdy. Dırektor retinde talaı balalar men jasóspirimderdi qanattandyryp, ómirden óz ornyn tabýǵa septigin tıgizdi. Toqsanynshy jyldardyń toqyraý zamanynda aýdandaǵy sport mektebiniń joıylyp ketpeýi úshin bar kúsh-jigerin jumsady. Aýdan, oblystaǵy tıisti mekemelerdiń, elordadaǵy mınıstrlikterdiń tabaldyryǵyn tozdyryp, aılap-jyldap jalaqy almasa da óz isine degen adaldyǵynan aınymaǵan el aǵasyna óńir turǵyndary dán rızashylyqtaryn jasyrǵan emes.
Týǵan jeri men eline bergeni kóp el aǵasynyń qazasy kópshiliktiń qabyrǵasyn qaıystyrdy. Túrkistan jurty marqumnyń orny tolmas qazasyna qaıǵyryp, artynda qalǵan otbasyna kóńil aıtýda.