Almaty ákimniń orynbasary Maqsat Kıkımov óńirde birqatar áleýmettik mańyzy bar taýarlardyń baǵasy arzandaǵanyn aıtty, dep habarlaıdy Egemen.kz.
Almatyda V, S klasty 3583 azyq-túlik dúkeni jumys isteıdi. Onyń ishinde: Alataý aýdanynda - 500 dúken, Almaly aýdanynda - 395, Áýezov aýdanynda - 605, Bostandyq aýdanynda - 488, Jetisý aýdanynda - 400, Medeý aýdanynda - 325, Naýryzbaı aýdanynda - 350, Túrksib aýdanynda - 525 dúken bar.
Baqytjan Saǵyntaevtyń tapsyrmasyna sáıkes, qala ákimdigi aýdan ákimdikteri men Nur Otan partııasynyń ókilderimen birlesip «úı janyndaǵy» 1773 dúkende áleýmettik mańyzy bar azyq-túlik taýarlary baǵasynyń negizsiz ósýine jol bermeý boıynsha kúndelikti monıtorıng júrgizedi.Monıtorıng qorytyndysy boıynsha Túrksib aýdanynan basqa 7 aýdannyń 61 dúkeninde ÁMAT baǵasynyń negizsiz ósý faktileri anyqtaldy.
M.Kıkımovtyń aıtýynsha, profılaktıkalyq jumystardyń nátıjesinde azyq-túlik taýarlarynyń kelesi túrleriniń baǵasy tómendedi: kúnbaǵys maıy 15%-ǵa (920-dan 780 tg/l); sút ónimderi 5%-ǵa (aıran 315-ten 300 tg/l, sút 295-ten 280 tg/l); áleýmettik nan 10%-ǵa (100-den 90 tg/l); birinshi surypty un 10,2%-ǵa (245-ten 220 tg/kg-ǵa); birinshi sanatty jumyrtqa 6,2%-ǵa (490 teńgeden 460 tg/ondyqqa deıin); qant 5,7%-ǵa (350 teńgeden 330 tg/kg-ǵa deıin).
Qalǵan 1810 dúken boıynsha jumystar qańtar aıynyń sońyna deıin júrgiziledi, monıtorıng boıynsha jumys turaqty negizde júrgiziletin bolady.