Qalalyq mobıldilik basqarmasynyń basshysy Ǵanı Myrzahanov onlaın-brıfıng barysynda trolleıbýs parkindegi jańǵyrtý jumystary týraly aıtty, dep habarlaıdy Egemen.kz.
Spıkerdiń aıtýynsha, Almatyda trolleıbýs jelilerin jańǵyrtý jalǵasýda.
«Búginde 172 shaqyrym jol qaıta jóndeýden ótti. Baılanys jelileri úshin 604 jańa tirek ornatyldy. Barlyǵy 38 kóshede jumystar júrgizý josparlanýda. Jelilerdi qalpyna keltirý jumystary bıyl aıaqtalady dep kútilýde», dedi basqarma basshysy.
Sonymen qatar, ol trolleıbýs parkin jańǵyrtý aıasynda 190 trolleıbýs satyp alynatynyn aıtty.
«10 qosalqy stansııany qaıta qurý jáne 190 trolleıbýs satyp alý josparda bar. Eýropa qaıta qurý jáne damý bankimen (EQDB) qarjylandyrý týraly aldyn ala kelisimge qol qoıyldy. Bıyl biz 100 trolleıbýs satyp alamyz. Olar qalaǵa jyldyń sońyna deıin nemese kelesi jyldyń basynda jetkiziledi. Qalǵan 90-y eki jyl ishinde ákelinedi», dedi Ǵanı Myrzahanov.