JEŃISPEN QURDAS AQYN SERIKBAI OSPANOVTYŃ JYR KEShI OSYLAI ATALDY
Belgili aqyn Serikbaı Ospanovtyń jyr keshi bolyp ótti. Jeńispen qurdas aqyn bıyl 65 jasqa toldy. Ol oqyrmandarymen bul kezdesýin “Jan ańsaǵan jalǵyz sóz” dep atady.
– Soǵys jyldary aýylda jurttyń maıdan jaqqa qulaǵyn tosyp, saryla kútkeni, ańsap, armandaǵany “Jeńis!” degen jalǵyz sóz edi. Qansyraǵan halqymyzǵa osy “Jeńis” degen bir aýyz sóz qýat bolǵan jyly ómirge bizder kelgen ekenbiz. 1945 jyly týǵandar maıdannan múgedek, aqsaq-toqsaq bop kelgenderdiń balalary. Meniń ákemniń de soǵystan bir qoly joq bolyp oraldy. О́zi aǵashtan túıin túıgen sheber edi. Meniń bala kezimde bir qolymen dombyra jasady. Ony jalǵyz qolymen tarta almaı, tek qarap otyratyn. Buryn dombyra tartqan adamǵa munan artyq qasiret bar ma?–deıdi aqyn.
Bala kezdegi osy sýrettiń barlyǵy da keıin aqyn qalamynan óleń bolyp tógildi.
“Qaldyrǵysy keldi me eken ol mura,
Dombyra tartý álde armany
boldy ma?
Jalǵyz qol bop oralyp
ákem maıdannan,
Qaraǵaıdan jasap berdi dombyra”,– dep jazdy ol. Maıdannan qolsyz, múgedek bolyp kelgen áke balasyna úı turǵyzyp, astyna mashına alyp bere almady, tek ónerin mura etip qaldyrdy.
Osy keshte Serikbaı Ospanovtyń negizinen soǵys taqyrybyna arnalǵan óleńderin I.Omarov atyndaǵy oblystyq drama teatrynyń ártisteri oqydy. Aqyn poezııasyndaǵy lırıkalyq keıipker baıandaǵan surapyl jyldar sýreti alysta qalsa da, sanada jańǵyryp turady. Sonymen birge Serikbaı Ospanovtyń sózine jazylǵan ásem ánder kesh ajaryn asha tústi.
Názıra JÁRIMBETOVA.
QOSTANAI.