Selınograd aýdanyna qarasty Opan aýylynyń mańynda jalpy kólemi 5 379 gektardy quraıtyn alqaptyń orlanyp, qorshalǵany týraly habar jetken. Máseleniń mán-jaıyn bilsek, rasynda da solaı eken.
Aýyl turǵyndary seriktestiktiń egin alqaptaryn beısaýat maldyń tuıaǵynan qorǵaý úshin tereń or qazyp qorshap tastaǵanyn aıtyp dabyl qaǵýda. Tórt túlik mal úshin ǵana emes, ań-qusqa da qaýipti ekenin beınebaıanmen jáne sýrettermen dáleldep otyr. Selınograd aýdandyq jer qatynastary bóliminiń aqparatyna qaraǵanda, «Antonovka» JShS ózine tıesili jer teliminde egistik alqabyn qorǵaý maqsatynda alqapty aınaldyra otyryp, eni 1,5 metr, tereńdigi 2,5 metr, jalpy uzyndyǵy 46 shaqyrym bolatyn 5 379 gektar alqapty aınaldyra qazǵan. Qoldanystaǵy zańnamaǵa súıensek, or qazý arqyly jerdi qorshaý zań buzýǵa jatady. Topyraqtyń ústińgi qunarly qabatyna zalal keltirgeni ózi aldyna, egistik jer seriktestikke ýaqytsha paıdalanyp, egin egý úshin berilgen, or qazý úshin emes.
Árıne, seriktestik basshylary mańdaı termen ósirgen eginin qorǵaýy kerek. Bul úshin egin kóktep shyqqan soń qoryqshy qoıǵan lázim. Burynnan bar tájirıbe. Beısaýat mal eginge túsip, zııan keltiretin bolsa, qoldanystaǵy tártip boıynsha zııanyn óteıdi. Al or qazý – shekten shyqqan áreket. Mal bylaı tursyn, adam úshin de qaýipti. Eger alda-jalda órt qaýpi týa qalsa, órt sóndirýshiler de alqapqa óte almaıdy ǵoı. Ań-qusqa qanshalyqty zııany baryn bilmek bolyp oblystyq orman sharýashylyǵy jáne janýarlar dúnıesi aýmaqtyq ınspeksııasyna saýal joldadyq. Inspeksııadan kelgen jaýaptyń túıini mynadaı. 2021 jylǵy qyrkúıektiń 28-29-y kúnderi ınspeksııanyń bas mamandary Q.Musaǵalıev, D.Ahmetov «Jasyl aımaq» mekemesiniń mamandary A.Baızahov, N.Álshinbaevpen birge Selınograd aýdanynyń Prırechenskıı aýyldyq okrýgindegi Antonovka aýylyna (qazirgi Opan aýyly) bardy. Tekserý barysynda «Antonovka» JShS-ǵa tıesili 5 379 gektar jer teliminde eni 1,5 metr, tereńdigi 2,5 metr jáne uzyndyǵy 46 shaqyrym bolatyn or ekskavatormen qazylǵany anyqtaldy. Seriktestiktiń memlekettik orman qory jerlerine qatysy joq.
Inspeksııa basshysy Lashyntaı Dúısenovtiń aıtýyna qaraǵanda, ázirshe ań-qusqa tónip turǵan qater joq. Al oblystyq jerdiń paıdalanýy men qorǵalýyn baqylaý basqarmasy bizdiń saýalymyzǵa mynadaı jaýap joldady. Saýaldy qarastyrý barysynda kadastrlyq nómiri 01-011-048-098, jalpy aýdany 5 379 gektardy quraıtyn jer ýchaskesi Selınograd aýdany ákimdiginiń 2003 jylǵy №366, 2004 jylǵy №342 qaýlylarymen «Antonovka» seriktestigine taýarly aýyl sharýashylyǵy óndirisin júrgizýge ýaqytsha óteýli uzaqmerzimdi paıdalanýǵa berilgendigi anyqtaldy. Jaýaphatta ordyń qazylǵandyǵy anyq kórsetilgen. 2022 jyldyń 1 qańtarynan bastap jergilikti atqarýshy organdardan jerdi paıdalaný men qorǵaýdyń memlekettik baqylaý fýnksııalaryn oblystarda, respýblıkalyq mańyzy bar qalalarda jáne astanada aýmaqtyq bólimsheler qura otyryp, ortalyq ýákiletti organnyń vedomstvosyna qaıtarý kózdelgen. Búgingi kúni Qazaqstan Respýblıkasynyń Zańnamasy sheńberinde qaıta uıymdastyrý (taratý) rásimi aıaqtalǵanǵa deıin jerdiń paıdalanýy men qorǵalýyna memlekettik baqylaý júrgizýge múmkindik joq.
Basqarmanyń jaýaby osyndaı. Biraq or búgin qazylyp otyrǵan joq qoı. Oblystyq orman sharýashylyǵy jáne janýarlar dúnıesi aýmaqtyq ınspeksııasy 2021 jyldyń qyrkúıek aıynyń sońynda tekseris júrgizgen. Demek or onyń aldynda qazylǵan. Ol ýaqytta oblystyq jerdiń paıdalanýy men qorǵalýyn baqylaý basqarmasynyń quzyreti ózinde. Endeshe, nege ýaqytynda shara qoldanylmaǵany túsiniksiz.
Aqmola oblysy,
Selınograd aýdany