Bokstan Tokıo Olımpıadasynyń qola júldegeri, 2021 jylǵy álem birinshiliginiń chempıony Sáken Bıbosynov ózbekstandyq boksshy Hasanboı Dýsmatovpen, jaqsy usynys bolsa, sharshy alańda qaıta judyryqtasýǵa daıyn ekenin aıtty.
Osydan birer apta buryn Rıo Olımpıadasynyń chempıony, Vel Barker kýbogynyń ıegeri, О́zbekstannyń maqtanyshyna aınalǵan Hasanboı Dýsmatov qazaqtyń qaısar uly Sáken Bıobosynovpen kásipqoı boksta qaıta kezdeskisi keletinin jalpaq jurtqa málimdegen bolatyn. О́z kezeginde Sáken de qarsylasynyń bul usynysyn qýana qoldaıtynyn, tek promoýterler jekpe-jekke laıyqty qarjy tikse ǵana judyryqtasatynyn jetkizdi.
«Árıne, ekinshi ret kezdesýge qarsy emespin. Eki tarap kelisimge kelip jatsa, árıne, judyryqtasamyn. Qaı salmaq bolsa da kelisim beremin. Biraq bul aıqastyń gonorary az bolmaýy kerek. Meniń de kisi qyzyǵatyndaı jetistikterim barshylyq. Onymen az aqshaǵa bola qolǵap túıistirgim kelmeıdi», deıdi qazaqstandyq bylǵary qolǵap sheberi.
Aıta keteıik, Sáken Bıbosynov pen Hasanboı Dýsmatov byltyr Serbııada ótken álem birinshiliginiń alǵashqy aınalymynda kezdesip, jerlesimiz aıqyn basymdyqpen jeńiske jetken edi.