Jeksenbi, 16 naýryz kúni Astanadaǵy «Qazaqstan» konsert zalynda «Qazaq arýy-2014» respýblıkalyq baıqaýy ótti.
Osymen tórtinshi ret ótkizilip otyrǵan aıtýly baıqaýda elimizdiń túrli óńirinen kelgen 21 úmitker synǵa tústi. Qatysýshylar sulýlyǵymen qatar, boılaryndaǵy talanttaryn pash etip, halqymyzdyń dástúrlerin, tarıhy men mádenıetin jaqsy bilip, olardy ardaq tutatynyn kórsete bildi.
Baıqaý birneshe kezeńnen turdy. Basynda arýlar otandyq dızaınerlerdiń qolynan shyqqan kıimderdi halyq nazaryna usynsa, artynan shyǵarmashylyq jáne zııatkerlik qabiletterin ortaǵa saldy.
Premer-Mınıstrdiń orynbasary Gúlshara Ábdiqalyqova jetekshilik etken qazylar alqasy qatarynda belgili telejúrgizýshi Aıgúl Múkeı, otandyq opera prımasy Nurjamal Úsenbaeva, dızaıner Aıda Qaýmenova, teatr jáne kıno akteri Ǵanı Quljanov, aıtys aqyny Aınur Tursynbaeva, L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov, «Habar» telearnasynyń baǵdarlamalar óndirisi dıreksııasynyń bas prodıýseri Rınat Kertaev, Astana qalasy mádenıet departamentiniń bastyǵy Bolat Majaǵulov pen «Qazaq arýy-2014» baıqaýynyń prodıýseri Baıan Esentaeva boldy.
Qazylar alqasy jarty saǵattaı keńes ótkizip, óz sheshimderin jarııalady. Úshinshi oryn elordalyq Gúlmaral Qajıhanǵa berildi. Al ekinshi oryndy mańǵystaýlyq Ulpan Nurmanova ıelense, birinshi oryndy Shyǵys Qazaqstan oblysynyń ókili Aıaýlym Erǵazy jeńip aldy.
Qazylar alqasynyń sheshimimen «Qazaq arýy-2014» ataǵy Mańǵystaý oblysynan kelgen Gúlnaz Jolanovaǵa buıyrdy.
Aıdar О́RISBAEV,
«Egemen Qazaqstan».
Sýretterdi túsirgen
Erlan Omarov,
«Egemen Qazaqstan».