Alashtyń bilimpaz qaıratkerleriniń biri Ǵazymbek Birimjanovtyń sýreti tabyldy. Máskeýdegi Petrov-Razýmovskıı atyndaǵy aýyl sharýashylyǵy ınstıtýtynyń arhıvinen tabylǵan fotosýret 1917 jyly túsirilgen. Alash qaıratkeriniń ómiri men murasyn zertteýshiler Ǵazymbek Birimjan 1917 jyly Orynbor realdy ýchılıshesin bitirip, Máskeý qalasyndaǵy Petrov-Razýmovskıı atyndaǵy ýnıversıtetke qujattaryn tapsyrǵan, bul sýret sonda túsirilse kerek dep boljap otyr.
Biraq Ǵazymbek atalǵan ýnıversıtette sol kezeńdegi saıası jaǵdaılarǵa baılanysty oqı almaǵan. Bul kezeń onyń Álıhan Bókeıhan, Ahmet Baıtursynuly syndy alash kósemderimen birge júrgen kezi bolsa kerek.
– Súıinshi habardy Máskeý qalasynan Ǵazymbektiń týǵan inisi Nurhan Qorǵanbekulynyń jalǵyz qyzynan taraǵan urpaq Leıla Narımanqyzy jetkizdi. Munyń aldynda Almaty qalasyndaǵy Ortalyq memlekettik arhıvte boldyq. Sol kezde 1909-1917 jyly aralyǵynda Ǵazymbektiń Orynbor realdy ýchılıshesinde oqyǵany týraly qujattar taptyq. Solardyń arasynan 1909 jyly Ǵazymbek stıpendııa ıelengenin bildik. Buǵan qol jetkizýge aǵasy, 1-2 Memlekettik dýmanyń depýtaty Ahmet Birimjan sebepshi bolǵan. Sol kisi bir jarym bettik ótinish jazypty. Al stıpendııaǵa úmitker bolyp, bir orynǵa talasqan ekinshi adam – Ahmettiń qaınysy, áıeli Gúljaýhar Seıdalınanyń týǵan inisi Súıingereı Seıdalın eken. 1917 jyly 21 qarashada «Qazaq» gazetinde «Alash» partııasynyń baǵdarlamalyq jobasy jarııalandy. Baǵdarlamany jazǵan jeti tulǵanyń biri osy Ǵazymbek-tin. Beınetqorlyqpen eńbek etti, taǵdyry da azapty boldy. Alashordashylarmen birge tutqyndaldy, jer aýdaryldy. 1937 jyly 41 jasynda atý jazasyna kesildi. Aıaýly arystyń artyna qaldyrǵan murasyn túgendeý – búgingi urpaqtyń paryzy, – deıdi qaıratkerdiń eńbekterin jeke jınaq etip qurastyryp, ǵumyrnamasyn zerdelep júrgen jas ǵalym Danııar Ihsan.
Qostanaı oblysy