Fýtboldan Qazaqstan quramasy Ulttar lıgasy aıasynda kóktemde Moldovamen bolatyn matchqa deıin Túrkııada oqý-jattyǵý jıyny men bir joldastyq kezdesý ótkizýdi josparlap otyr.
Fýtbol federasııasynyń taratqan málimeti boıynsha Talǵat Baısýfınov baptaıtyn Qazaqstan ulttyq quramasy 12 aqpan kúni Túrkııanyń Antalıa qalasynda jınalady. Al 13 aqpan kúni Qazaqstan klýbtarynyń legıonerlerinen jasaqtalǵan komandamen joldastyq kezdesý ótkizedi. Legıonerler quramasyn Andreı Karpovıch pen Samat Smaqov jattyqtyrady dep sheshildi.
«Bul merzimde FIFA-nyń resmı datasy bolmaǵandyqtan, ulttyq quramany uzaq ýaqyt jattyǵýsyz jáne oıynsyz ustap otyrýǵa bolmaıdy. Qazaqstan quramasynyń jankúıerleri bul matchty tikeleı efırden kóre alady. Matchtyń kórsetilimi qaı platformadan taratylatynyn jáne ýaqytyn keıinirek habarlaımyz», delingen federasııanyń resmı málimdemesinde.