«Hofbýrg» saraıynda Qazaqstan Respýblıkasynyń Tótenshe jáne ókiletti elshisi Qaırat Sarybaıdyń Avstrııa Respýblıkasynyń Federaldyq prezıdenti Haıns Fısherge Senim gramotasyn tapsyrý saltanaty bolyp ótti.
Suhbat barysynda qazaqstandyq dıplomat Avstrııa basshysyna Qazaqstan Prezıdenti N.Nazarbaevtyń sálemin jetkizdi. О́z kezeginde, H.Fısher Qazaqstan basshysynyń jyly lebizderine rızashylyǵyn bildire kele, Qazaqstan-Avstrııa qatynasynyń damýyna úlken mańyz beretinin atap ótti. Saýda-ekonomıkalyq baılanystyń tabysty órbýin aıta otyryp, ol bul salanyń zor áleýetine nazar aýdardy.
Elshi Qazaqstan Avstrııanyń jasyl tehnologııalar, qurylys jáne týrızm salalaryndaǵy úzdik jetistikterin esepke ala otyryp, osy el tarapynan ınvestısııalardyń ulǵaıtylýyna múddeli ekenin atap ótti. Q.Sarybaı Astanada ótetin EKSPO-2017 halyqaralyq mamandandyrylǵan kórmesi avstrııalyq kompanııalar úshin tıimdi alań bola alatynyna nazar aýdardy.
Suhbat sońynda H.Fısher Prezıdent N.Nazarbaevqa óziniń izgi tilekterin jetkizip, elshini laýazymdyq mindetterine resmı kirisýimen quttyqtady.
«Egemen-aqparat».