Leonardo da Vınchıdiń qoljazbalary, sýretteri men syzbalary saqtalǵan ataqty «Ambrozıana» kitaphanasy zaldarynyń birinde Qazaqstan elshiligi «Alýan túrliliktegi tutastyq. Búgingi Qazaqstannyń etnostyq toptary, dinderi men mádenıetteri» monografııasynyń tusaýkeserine arnalǵan dóńgelek ústel ótkizdi.
Atalǵan monografııany «Eýrazııa» baǵdarlamasy sheńberinde Italııanyń ISAG ınstıtýtynyń sarapshylary men ǵylymı qyzmetkerleri ázirledi. Basylymda dinaralyq únqatysý máseleleri men Qazaqstannyń osy saladaǵy saıasaty jónindegi maqalalar, suhbattar jáne saraptamalyq materıaldar, Prezıdent N.Nazarbaevtyń Álemdik jáne dástúrli dinder kóshbasshylarynyń 3 sezinde sóılegen sózi, sondaı-aq, Qazaqstannyń Ulttyq birligi doktrınasy men «Qazaqstan halqy Assambleıasy týraly» Qazaqstan Respýblıkasynyń Zańy sııaqty qujattar qamtylǵan. Atalǵan sharaǵa Italııanyń din salasyndaǵy jetekshi sarapshylary, qoǵam qaıratkerleri, mádenıet jáne ǵylym qaıratkerleri, Mılan ýnıversıtetiniń professorlary men oqytýshylary qatysty.
Qazaqstannyń Italııadaǵy elshisi A.Elemesov óziniń sózinde ıtalııalyq qaýymdy táýelsiz Qazaqstandaǵy memlekettik saıasattyń negizgi qaǵıdasyna aınalǵan dinaralyq toleranttylyqtyń erekshelikterimen tanystyryp ótti. 20 jyldan astam ýaqyt Qazaqstanda turǵan, al qazir «Ambrozıana» kitaphanasynyń ǵylymı qyzmetkeri bolyp tabylatyn mılandyq professor jáne katolık dininiń qyzmetshisi Edýardo Kanetta Qazaqstandaǵy jınaǵan óziniń jumys tájirıbesimen bólisti.
Italııa tarapy Qazaqstannyń din salasyndaǵy saıasaty búkil dúnıejúzi boıynsha qyzyǵýshylyq týdyryp otyrǵandyǵyn atap ótti.
«Egemen-aqparat».