«Aıqyn tarıfi» ashyqtyqqa negizdeledi

«Nur Otan» partııasy «Aıqyn tarıf» jobasyn iske qosyp otyr. Bul jóninde keshe osy partııanyń Parlament Májilisindegi fraksııasy janyndaǵy Ekonomıkalyq saıasat jónindegi keńestiń jáne «Nur Otan» partııasy Saılaýaldy tuǵyrnamasynyń «Innovasııalyq ekonomıka» baǵytyndaǵy sarapshylar tobynyń bas qosqan otyrysynda aıtyldy. Keńes otyrysynda ener­gııa únemdiligi men kásip­oryn­dardaǵy energııa tıimdiligin arttyrý máselesi jan-jaqty talqyǵa tústi. Otyrysta sóz alǵan In­dýs­trııa jáne jańa tehnologııalar vıse-mınıstri Albert Raý júrgizilip kele jatqan qýat únemdeý saıasaty tıisti nátıjege qol jetkizip otyrǵandyǵyn atap ótti. Onyń aıtýynsha, el­diń ishki jalpy óniminde energııa jumsalýy 2008 jylmen sa­lystyrǵanda 13,5 paıyzǵa azaı­ǵan. Sóıtip, IJО́ energııa jum­salýynyń ÚIIDMB maqsatty kórsetkishi 10 paıyz merziminen buryn oryndalǵanyn kórsetken. Budan basqa, shara ba­ry­­syn­da tabıǵı monopolııa sýbek­tileriniń qarjy jum­sa­ýy­na baqylaýdy kúsheıtýge jáne ın­ves­tısııalyq baǵdar­lamalardy daıyndaý men júzege asyrýdy barynsha ashyq júrgizýge baǵyttalǵan «Aıqyn tarıf» jobasy jan-jaqty talqylandy. Bul tarıf túri jeke tulǵalarǵa arnalǵan kommýnaldyq qyzmet baǵasynyń qalyptasý deń­geıiniń ashyqtyǵyn arttyrýǵa tıis, dep kútilýde. «Aıqyn tarıf» jobasy bo­ıynsha jumys eki baǵytta júrgizilmek eken. Atap aıtqanda, birinshiden, tabıǵı monopolııa sýbektileri qarjysynyń jumsalýyna baqylaýdy kú­­sheı­tý josparlanǵan. Osy oraıda táýelsiz kásibı sarapshy­lar­dy qatystyrý da oılasty­rylyp, ásirese, ashyq tekserý­ler júrgize otyryp, kommý­nal­­dyq qyzmet kórsetý sala­syn­­daǵy ınvestısııalyq baǵ­dar­­lamalardyń daıyndalýy men oryndalýyna baılanysty azamattyq baqylaýdyń tetigi je­­tiletin bolady. Ekinshi baǵyt monopolıst-kompanııalar­­dyń jań­­ǵyrtý men tarıfti ózgertý jos­paryna oraı turǵyndardy ha­bardar etýin kúsheıtýdi kóz­deıdi. Mundaı habardar etý tetikteri retinde qoǵamdyq baqy­laýdyń quraldaryn paıdalaný usynylyp otyr. Osy másele boıynsha tú­sinik bere ketken «Nur Otan» partııasynyń hatshysy Eldar Syzdyqov óz oıyn bylaısha órbitti: «Kommýnaldyq qyzmet baǵasy udaıy ósedi, osyǵan oraı turǵyndarda birqatar saýaldar týyndaıdy. Tarıf qurylymy aıqyndyǵynyń deńgeıin kóterý úshin biz únqatysý alańyna sarapshylardy tartýdy josparlaýdamyz, ol jerde áleýmet pen monopolıst-kompanııalar kúrdeli máselelerge baılanysty pikirlese alatyn bolady». Asqar TURAPBAIULY, «Egemen Qazaqstan».