Keshe Qasym-Jomart Toqaevtyń tóraǵalyq etýimen Parlament Senaty bıýrosynyń otyrysy boldy. Bıýro músheleri palatanyń 20 naýryzda bolatyn otyrysynyń kún tártibin qarady, dep habarlady Senattyń baspasóz qyzmeti.
Otyrysta Qazaqstan men Vetnam arasyndaǵy azamattyq ister boıynsha ózara quqyqtyq kómek týraly kelisimdi; Eń tómengi jalaqyny belgileý resimin jasaý týraly konvensııany (26-konvensııa); Jalaqyny qorǵaý týraly konvensııany (95-konvensııa) ratıfıkasııalaý týraly zań jobalaryn; «Azamattyq qorǵaý týraly» jáne azamattyq qorǵaý máseleleri boıynsha ilespe zań jobalaryn birinshi oqylymda, zańnamaǵa ishki ister organdarynyń qyzmeti máseleleri boıynsha ózgerister men tolyqtyrýlar engizý týraly zań jobasyn ekinshi oqylymda qaraý josparlandy.
Bıýroda Májiliste maquldanǵan zań jobalaryna Senattyń bas komıtetteri belgilendi. Halyqaralyq qatynastar, qorǵanys jáne qaýipsizdik komıtetine 1994 jylǵy 28 naýryzdaǵy Qazaqstan men Reseı arasyndaǵy ónerkásiptik avarııalardyń, apattardyń, dúleı zilzalalardyń aldyn alý jáne olardyń zardaptaryn joıý salasyndaǵy yntymaqtastyq týraly kelisimge avarııalyq-qutqarý qyzmetteri men qurylymdarynyń memlekettik shekarany kesip ótýiniń ońaılatylǵan tártibi týraly úkimetaralyq hattamany ratıfıkasııalaý týraly zań jobasy berildi. Sondaı-aq, osy komıtet Qazaqstan men Qyrǵyzstan arasyndaǵy Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyqty qurý týraly úkimetaralyq kelisimdi ratıfıkasııalaý týraly zań jobasyna bas komıtet bolyp belgilendi.
Odan basqa, bıýroda Qazaqstan Respýblıkasy Parlamenti Senatynyń Qurmet gramotasymen marapattaý máselesi de qaraldy.