«Azamattarǵa arnalǵan úkimet» memlekettik korporasııasynyń bastamasymen Ádilet mınıstrligi Jyljymaıtyn múlikke quqyqtardy tirkeý erejelerine ózgerister engizdi, dep habarlaıdy Egemen.kz.
Endi notarıýsta jyljymaıtyn múlikke quqyqtardy tirkeý boıynsha jasalǵan mámileden keıin klıent qalaýy boıynsha qosymsha aqy tólep, qyzmet nátıjesin tólem jasalǵan sátten bastap eki saǵat ishinde jedeldetilgen tártippen ala alady.
Búgingi tańda notarıýsqa júgingen klıentterge nátıjeler jyljymaıtyn múlikke quqyqtardy tirkeý úshin aqy tólengeni jónindegi málimet quqyqtyq kadastrdyń aqparattyq júıesine kelip túsken kúnnen keıingi bir jumys kúninen keshiktirilmeı beriledi. Kóbine bul ıpotekany, nesıeni, kepildi jáne bankterdegi basqa da qajettilikterdi resimdeıtin klıentterdiń múlkin qujattaý prosesin keshiktirýi múmkin.
«Qyzmet kórsetý ýaqytyn qysqartý ákimshilik kedergiler men sybaılas jemqorlyq táýekelderin joıýǵa múmkindik beredi. Prosesti jedeldetý úshin azamattar quqyq buzýshylyqqa ákelýi múmkin túrli aıla izdeıtinin joqqa shyǵarmaımyz. Bul ózgerister jyljymaıtyn múlikti satý naryǵyna da aıtarlyqtaı áser etedi», deıdi «Azamattarǵa arnalǵan úkimet» memlekettik korporasııasy Qyzylorda oblysy boıynsha fılıaly dırektorynyń orynbasary Rahat Jaısanbaev.
Buǵan deıin «Azamattarǵa arnalǵan úkimet» Kaѕri kompanııasymen birlesip, jyljymaıtyn múlikti notarıýstarda tirkegen klıentter úshin Kaspi.kz qosymshasynda qyzmet aqysyn tóleý múmkindigin iske asyrǵan bolatyn.