Almatyda aıy-kúni jetip otyrǵan Talshyn esimdi kelinshek Jańa jyl qarsańynda taıyp jyǵylyp, aýyr jaǵdaıda jedel járdemmen aýrýhanaǵa jetkizilgen edi. 27 jeltoqsanda bolǵan bul jaǵdaıdy odan keıingi oqıǵalar umyttyrdy.
Kóshede kele jatyp qatty taıǵanaǵan Talshyn qulap bara jatyp, barynsha ishindegi sharanaǵa zaqym keltirmeýge tyrysqandyqtan, oń jaq aıaǵy tómen jaǵynan ekige bólinip, synyp ketkenin oılaýǵa shamasy kelmegen edi.
Talshyndy №4 qalalyq aýrýhanaǵa ákelgen kezde júktiliginiń 40-shy aptasy bastalyp, týra bir aptadan soń bosanýǵa tıis bolatyn. Travmatologterge mundaı jaǵdaıda aıaǵy aýyr áıeldiń tolǵaǵyn keltirmeı jáne ishtegi nárestege de eshbir zaqym tıgizbeı qalaı ota jasaýǵa bolady degen kúrdeli máseleni sheshýge týra keldi.
«Aıaǵy mort synǵan júkti áıeldiń bizge ákelingeni týraly habarlanǵan sátten bastap konsılıým jınaý týraly sheshim qabyldandy. Qabyldaý bólimshesinde naýqasty klınıkanyń jetekshi travmatolog, ortoped, hırýrg, anestezıolog jáne gınekolog dárigerleri qarsy aldy. Tez áreket etý kerek boldy. 27 jastaǵy pasıent tuńǵyshyna aıaǵy aýyr eken. Áıeldiń bosanatyn merzimi jetkenin eskere otyryp, kómek kórsetýdiń birneshe ádisi qarastyryldy. Hırýrgııalyq em júrgizý týraly sheshim qabyldanyp, súıek kemigi ishilik buǵattalatyn ózekshemen asyqty jiliktiń osteosıntezi jasaldy. Bul áıelge kesar tiligine júginbeı bosanýǵa, sondaı-aq tez aıaqqa turyp, sábıdi kútýge múmkindik beretin edi», deıdi Almatydaǵy №4 qalalyq klınıkalyq aýrýhanasy bas dárigeriniń orynbasary Sáýle Mardenova.
Shuǵyl túrde júkti naýqas jansaqtaý bólimine jatqyzylady. Otany qabyldaý bóliminiń meńgerýshisi Magadın Haıroev júrgizip, áriptesine jetekshi travmatolog Konstantın Morozov kómektesti. Kúrdeli otaǵa akýsher-gınekolog jáne neonatologi bar №4 perzenthana dárigerleriniń brıgadasy da qatysty. Operasııa 1,5 saǵatqa sozyldy. Bul travmatologten zergerlik dáldikti talap etetin jaǵdaı bolǵandyqtan, operasııaishilik rentgen júıesi qoldanyldy.
«Súıek kemigi ishilik buǵattalatyn ózekshemen oń jaq asyqty jiliktiń jabyq osteosıntezi jasaldy. Bul – syrtynan bekitpeı jasalatyn súıek synyqtarynyń qosyndysy. Osteosıntez synyqtardyń tolyq birikkenge deıin myqty bekitilýin qamtamasyz etedi. Bul ádistiń artyqshylyǵy sonda, onyń aǵzaǵa zaqymy barynsha az. Sonymen qatar biz naýqastyń otadan birneshe kún ótken soń synǵan aıaǵyna kúsh sala alǵanyn qalaımyz», dedi dáriger Magadın Haıroev.
Ári qaraı dárigerler Talshynnyń óz kúshimen bosanýyn kútýge sheshim qabyldaıdy, árıne bul anasynyń qınalmaı, nárestesiniń de kúızelissiz dúnıege kelýine septesti. №4 perzenthananyń akýsher-gınekologteri júkti áıelge aýrýhanada kún saıyn baryp turdy. Qazir dárigerler ota kezeńi men otadan keıingi kezeńdi sabyrmen ótkergen Talshynnyń erligine tánti bolyp otyr. Ol úreıge boı aldyrmaı, erekshe shydamdylyq tanytqan.
Osydan keıin ǵana Talshyn bosaný úshin №4 perzenthanasyna aýystyryldy, al 2 qańtarda ul týdy.
«Biz jubaıym ekeýmiz №4 qalalyq aýrýhanasy men perzenthana dárigerlerine óte rızamyz. Olardyń kómeginiń arqasynda qol-aıaǵymdy baýyryma alyp, durys bosandym. Ulymyz 3 400 gr salmaqpen dúnıege keldi, atyn Sultan dep koıdyq. Bul jaraqat pen otadan keıin bir apta ótti, qazir ózim júre alamyn. Dárigerlerdiń qaraýynda bolǵan kezde olardyń shynaıy qamqorlyǵyna bólendim. Qudaı aq halatty abzal jandarǵa myzǵymas densaýlyq bersin», dedi Talshyn perzenthanadan shyqqan kúni.
ALMATY