Úrjar aýdanynyń Kóldeneń aýyldyq okrýgindegi «Iýbıleınyı» JShS-i aýyl sharýashylyǵy ónimderin óndiredi. Seriktestik sońǵy úsh jylda aýdanǵa 8 mln teńgeden astam ınvestısııa tartty. Mamyrbek Qarashev jetekshilik etetin seriktestiktiń 7 myńnan astam gektar jeriniń basym bóligi egistik bolsa, 2 myń gektary – shabyndyq pen jaıylym.
Búginde 50-ge jýyq aýylsharýashylyq tehnıkalary bar qurylym taıaýda 162 mln teńgege John Deere traktoryn, 88 mln teńgege keshendi tuqymsepkish aldy. «Iýbıleınyı» JShS atqarýshy dırektory Beıbit Aıtpaevtyń aıtýynsha, 50 mln teńgege – shvesııalyq «Top Taýn-600» markaly aýylsharýashylyq qurylǵysy, 40 mln-ǵa – anglııalyq JCB júk tıegishi, 22 mln-ǵa – ýkraınalyq SZ-6 tuqymsepkishteri, 5 mln-ǵa – «Rostselmash» soqasy, 10 mln teńgege – Akros kombaıny, 11 mln-ǵa ıtalııalyq MaterMass tuqymsepkishi alyndy. Bári – zamanaýı tehnıka. Bir jaqsysy, kabına ishindegi monıtor arqyly dánniń qalaı sebilip jatqanyn da baqylap otyrýǵa bolady. Osy rette Nıkolaı Dzıadýk, Erlan О́tegenov, Sergeı Aktelov, Erjan Shalov, Sergeı Grechıhın, Evgenıı Kraınıýk jáne t.b. eńbekqor azamattar ózderine júktelgen iske zor jaýapkershilikpen qaraıtynyn aıta ketken lázim. Seriktestik bıdaıdyń «Barys», «Darıa», «Altaı» tuqymdaryn, Syngenta JShS-niń álemge tanymal «Kondı», «Alkantara», «Pıoner», «Trıstan» sekildi kúnbaǵys tuqymdaryn egedi. Álbette, ónimniń mol bolýy agrotehnıkalyq sharalardyń qatań saqtalýy men dándi, maıly daqyldardy tikeleı tyńaıtqyshpen sýarylýyna da baılanysty. Mundaǵy dıqan qaýymy bul sharalarǵa da nazar aýdaryp, «Ammofos», «Sýlfoammos» sekildi tyńaıtqyshtardy ońtústiktegi oblystardan alady.
Jalpy, Kóldeneń aýyldyq okrýgi Tarbaǵataıdyń kúngeı betindegi qoınaýynda ornalasqan. Sondyqtan, topyraǵynyń bonıteti joǵary, óte qunarly. Máselen, byltyr bıdaıdyń ár gektarynan 18-20 sentnerden alsa, bıylǵy qýańshylyqta astyq 12 sentnerden aınaldy. Osy oraıda «Iýbıleınyı» JShS basshysy Mamyrbek Qarashev jaıly aıtqan abzal. Mamyrbek Baqtyǵazyuly – Shyǵys Qazaqstan oblystyq máslıhatynyń depýtaty, osy Kóldeneń aýylynda dúnıege kelgen. Kóldeneń orta mektebinen bilim alyp, eńbek jolyn týǵan jerinen bastaǵan. Eńbek jolyn 1989 jyly «Iýbıleınyı» kolhozynda jumysshy bolyp bastap, keıin avtokólik júrgizýshisi, mehanızator bolyp jalǵastyrady. 1996 jyly kolhoz taratylyp, sonyń negizinde «Iýbıleınyı» JShS quryldy da ujymdyq sharýashylyqtyń sheshimimen atalǵan seriktestiktiń maı óndirý sehy men ortalyq qyrman meńgerýshisi boldy. 2012 jyly quryltaıshylar jınalysymen seriktestik dırektory bolyp saılandy.
Qarashevtar áýleti aýyldastaryna kóptegen qaıyrymdylyq is jasap, qurmetke bólenip keledi. Aýylǵa 120 adamdyq meshit ǵımaraty, 280 oryndy qatymhana, záýlim sport kesheni, 150 adamdyq «Dýman» meıramhanasy men dıirmen men naýbaıhana salyp berdi.
– Mamyrbek Baqtyǵazyuly birneshe jyl buryn aýyl ortalyǵyndaǵy tozyǵy jetken mádenıet úıin satyp alyp, 24 mln teńgege qaıta jóndetti. Mádenıet úıi burynǵydan da ásem qalpyna keldi. Atalǵan mádenı oshaq aýdandyq mádenıet bóliminiń qaramaǵyna ótip, onda birneshe ónerpaz halyqqa qyzmet etedi, – deıdi Kóldeneń aýyldyq okrýginiń ákimi Saılaý Estemesov.
Aýyl azamattaryna jumys berip otyrǵan «Iýbıleınyı» JShS-i aıtýly merekelerge de qarajat bóledi. Máselen, taıaýda aýyl sharýashylyǵy kúnine 5,5 mln teńge bólip, eńbekkerlerge turmystyq tehnıkalar tartý etti. Sondaı-aq aýyl jastaryna kómegin kórsetip, sportqa turaqty kóńil bóledi. Boks, voleıbol, jeńil atletıka, kúresten jeke qarajatyna týrnır ótkizedi.
– Seriktestik basshysy aýylǵa kóship kelgen jas otbasylarǵa turǵyn úı alyp beredi. Erjan Shalov, Oleg Rýdenko, Farhat Qudyshev, Erzat О́tegenovter Mamyrbektiń arqasynda byltyr baspanaly boldy. Aýyl ımamyna úı, motosıkl alyp berdi, – deıdi aýyl ákimi, – Aıta bersek, mundaı ıgi isteri kóp. Múgedek balaǵa arba, sport mektebine «Ýaz» avtokóligin syılady. Jyl saıyn aýyldaǵy eńbek ardagerlerine áleýmettik azyq-túlik túrlerin, qys mezgilinde muqtaj jandarǵa 500 tonna kómir túsirip beretini naǵyz janashyrlyq.
Byltyrǵy qýańshylyq aýyl halqyna ońaı tıgen joq. Maly bar aǵaıyn saı-salany jaǵalap shóp shaýyp esi shyqty. Seriktestik te qarap jatpady. Kórshiles Naýaly, Kókózek, Qaratuma aýyldaryna arzan baǵamen mal azyǵyn satty. Máselen, salmaǵy 250-300 kılo bolatyn taılanǵan shópti qolynda tehnıkasy men shabyndyǵy bar keıbir aǵaıyn 8-10 myń teńgeden satsa, Mamyrbek Qarashevtyń seriktestigi 6 myń teńgeden berip, jurt alǵysyna bólendi.
Berikhan TAIJIGIT,
jýrnalıst
Shyǵys Qazaqstan oblysy,
Úrjar aýdany