Indýstrııa jáne ınfraqurylymdyq damý mınıstrliginiń aqparaty boıynsha elimizdegi kóp páterli úılerdiń 75%-da jaı seriktestik jáne menshik ıeleriniń birlestigi quryldy. Endi E-gov portalynda elektrondy sıfrly qoltańba (ESQ) kómegimen páter ıeleriniń jınalysyn ótkizýge jáne úıdi basqarý nysanyna qatysty daýys berýge bolady.
Búgingi tańda Qazaqstanda 34 933 úı basqarýdyń jańa túrine kóshti. Onyń ishinde 2 852 úıde múlik ıeleriniń birlestigi (MIB), 32 081 úıde jaı seriktestik quryldy. Bul – eldegi kóp páterli turǵyn úı qorynyń 75%-nan astamy.
Basqarýdyń jańa nysandaryna kóshken kóp páterli úıler sany Almaty qalasynda (3 523), Shyǵys Qazaqstan (2 789), Aqmola (2 523) jáne Qostanaı (2 451) oblystarynda kóp.
Esterińizge sala keteıik, kóppáterli turǵyn úılerdi basqarý salasynda jumys istep kele jatqan páter ıeleriniń kooperatıvteri 2022 jylǵy 1 shildege deıin qyzmet ete alady. Osy merzimnen keıin olar akt boıynsha barlyq tehnıkalyq, qarjylyq jáne ózge de qujattardy úı keńesterine berip, zańnamada aıqyndalǵan tártippen taratylýǵa tıis.
MIB-ke kóshý rásimin jedeldetý úshin E-Gov portalynda jańa nysandy tirkeı otyryp, elektrondy daýys berý qyzmeti iske qosylǵan.
Avtorlandyrý ESQ kómegimen júrgiziledi. Onda avtomatty túrde tirkeýden ótýge, «menshik ıesi» mártebesin rastaýǵa jáne óz úıi boıynsha daýys berýge bastama kóterýge bolady. Jınalystyń kún tártibin aıqyndaǵannan keıin menshik ıeleri jınalysqa silteme boıynsha kirip, tańdaýyn jasap, ESQ-men qol qoıady.
Úıdi basqarýdyń jańa formalary týraly zhkh.kz portalynan tolyǵyraq bilýge bolady. Al taqyrypqa qatysty suraqtaryńyzdy suraqtar.kz saıtynda qoıa alasyzdar.