Senbide Kanadanyń astanasy Ottavada myńdaǵan adam premer-mınıstr Djastın Trıýdonyń koronavırýsqa qarsy vaksınany mindetteýine qarsylyq tanytyp kóshege shyqty, parlament aldynda beıbit narazylyq aksııasyn ótkizdi.
Sherýge bastapqyda «Bostandyq kolonnasy» dep atalatyn júk kólikteriniń júrgizýshileri shyqqan edi. Olar vaksına egý talabyna narazylyq bildirdi. Biraq mıtıngtiń jalǵasy pandemııa kezinde úkimettiń shekteý sharalaryn kóbeıtýine qarsylyq retinde órbidi.
Mıtıng senbi kúni tań atpaı erte bastalyp, túske deıin jalǵasty. Turǵyndar Ottavanyń shyǵys pen batys jaǵalaýlaryn jáne olardyń arasyndaǵy jerlerge kólikterin qańtarǵan júrgizýshilerge túski as berdi.
Mıtıng kezinde betperde kıgender az boldy. Biraq kóbi qalyń kıindi, óıtkeni aýa temperatýrasy - 21 gradýsty kórsetip turǵan. Jergilikti medıanyń habarlaýynsha, qala ortalyǵyndaǵy saýda oryndary sherýshiler betperde kııýden bas tartqandyqtan esikterin jaýyp alǵan.
Jeke basyna qaýip tóngendikten D.Trıýdo jáne onyń otbasy Ottava qalasynyń ortalyǵyndaǵy úıinen ketken. Onyń keńsesi buǵan qatysty túsinikteme bermeıtinin aıtty. Trıýdonyń alańdaýyna sebep bar.
Osy aptanyń basynda ol júk kólikteri júrgizýshileriniń oı-pikirleri jalpy kanadalyqtardyń kózqarasyn bildirmeıtinin alǵa tartyp, olardy azshylyqqa teńedi. Kanadanyń transshekaralyq júk kóligin júrgizetinderdiń 90 paıyzǵa jýyǵy jáne halyqtyń 77 paıyzy eki ret koronavırýs vaksınasyn saldyrǵan.
Trıýdo qazan aıyndaǵy saılaý qarsańynda qyzmetkerlerge vaksına mindetteletinin jarııalady. Sodan keıin ótken aıda Kanada men Amerıka Qurama Shtattary transshekaralyq júk tasymaldaýshylarǵa vaksına salýdy tapsyrdy.