Pavlodar oblysy araǵa bes jyl salyp bokstan Qazaqstan chempıonatyn qabyldaıtyn boldy. Bul týraly oblystyq boks federasııasynyń 2021 jylǵa arnalǵan qorytyndy jıynynda QBF atqarýshy dırektory Maratbek Myqtybekov aıtty.
Jıynda sóz alǵan QBF atqarýshy dırektory Pavlodar oblysyna 2022 jylǵy Qazaqstan chempıonatyn ótkizý mártebesi jaıdan-jaı berilmegenin, jergilikti sportshylardyń keıingi jyldardaǵy oń nátıjeleriniń arqasynda osyndaı qurmetke ıe bolǵanyn jetkizdi. Shynynda da, byltyr Pavlodar oblysynyń bylǵary qolǵap sheberleri birqatar mańyzdy jarysta úzdikter qatarynan kórindi. Atap aıtar bolsaq, Sabyr Erbolat byltyr Polshanyń Kelse qalasynda ótken jastar arasyndaǵy álem chempıonatynda kúmis júlde jeńip alsa, Mılana Aıýpova men Hava Bolkoeva jastar arasyndaǵy Azııa chempıonatynyń altyn jáne qola júldegerleri atandy.
Sonymen qatar byltyr Pavlodar oblysy tarıhı eki jetistikke qol jetkizdi. Jergilikti boksshy Serik Temirjanov óńir tarıhynda tuńǵysh ret Olımpııa oıyndarynda baq synasa, eki aıdan soń Serbııa astanasyndaǵy álem chempıonatynda júldegerler qatarynan kórindi.
Jıyn sońynda Naǵashybek Áýbákirov Pavlodar oblysy boks federasııasynyń jańa prezıdenti bolyp saılandy.