Qazaqstan Respýblıkasynyń Brazılııa Federatıvtik Respýblıkasyndaǵy elshisi jáne elshilik qyzmetti Chılı Respýblıkasynda qosa atqarýshy Baqytjan Ordabaev Qazaqstan Úkimeti atynan Chılı prezıdenti Veronıka Mıshel Bachelet Herıanyń ulyqtaý rásimine qatysty.
Bılikti tapsyrý jáne ant berý rásimi el parlamentarııleriniń, sheteldik joǵary dárejeli qonaqtar men halyqaralyq uıymdar ókilderiniń qatysýymen Chılıdiń Ulttyq Kongresinde ótti.
B.Ordabaevtyń Chılıdiń burynǵy prezıdenti S.Pıneramen jáne jańa saılanǵan prezıdenti M.Bacheletpen hattamalyq kezdesýleri ótti.
S.Pınera ulyqtaý rásimine qatysqany úshin elshi B.Ordabaevqa alǵysyn bildirdi. Ol Qazaqstan Syrtqy ister mınıstri E.Ydyrysovtyń Chılıge ótken jylǵy resmı sapary men elshiniń taǵaıyndalýy dástúrli dostyq pen ózara tıimdi yntymaqtastyqqa qurylǵan ekijaqty qatynastar tarıhyndaǵy mańyzdy oqıǵa ekenin atap ótti.
Ulyqtaý sharasy sheńberinde ótken qysqa kezdesý barysynda M.Bachelet qazaqstandyq elshige óziniń osy laýazymǵa resmı kirisýine oraı ótken sharalarǵa qatysqanyna alǵysyn bildirdi.
B.Ordabaev Qazaqstan Prezıdenti N.Nazarbaevtyń atynan prezıdenttik saılaýda jeńiske jetýine baılanysty M.Bacheletke joldaǵan quttyqtaý hatyn tapsyryp, Qazaqstan Chılımen ekijaqty únqatysýdy odan ári jalǵastyratynyn atap kórsetti. Al Chılı prezıdenti Qazaqstan-Chılı qatynastary dostyq jáne ózara múddelestik turǵysynda damıtynyna senimin bildirdi.
«Egemen-aqparat».