О́ńirde jyl basynan beri 10 myńnan astam adam qaterli derttiń qarmaǵyna ilinip, bul oraıdaǵy kórsetkish 6,9 paıyzǵa ósken. Oblystyń bas sanıtarlyq dárigeri Aınagúl Mýsınanyń aıtýyna qaraǵanda, syrqattardyń deni – ekpe almaǵandar.
Sońǵy bir táýlikte 976 adamnyń boıynan qaterli indet belgileri anyqtalǵan. Juqpaly aýrýlar stasıonarlarynda 642 naýqas em qabyldaýda. Úsh adamnyń jaǵdaıy óte aýyr.
– Búginde oblys ortalyǵy men Býrabaı aýdanynda epıdemııalyq ahýal óte kúrdeli, – deıdi oblystyq bas sanıtarlyq dárigeri, – bir táýlikte oblys ortalyǵynda 480, Býrabaı aýdanynda 80 derek tirkelip otyr, ózge aýdandardaǵy ahýal da alańdatarlyq.
Bilim oshaqtaryndaǵy qazirgi jaǵdaı óte kúrdeli. Oblystaǵy 75 mekteptiń 109 synyby qashyqtan oqý formatyna aýysqan. Derekterge qaraǵanda, koronavırýstyń sońǵy shtamy bilim ordalarynda jaıylyp bara jatqanyn baıqaýǵa bolady. Oqýshylardyń sany kóp mektepterde qatań sanıtarlyq talaptar saqtalýǵa tıisti. Ázirge karantınge tolyǵymen jabylǵan mektepter joq. Sońǵy táýlikte mektep oqýshylary arasynda 127 jaǵdaı tirkelgen. Oqý jylynyń basynan beri bilim oshaqtary qyzmetkerleri arasynda 744 oqıǵa anyqtaldy. Demek mekteptegi sanıtarlyq saqtyq sharalary áli de talapqa saı emes.
Dert qaýpi óte kúshti ekenin taǵy bir eske salýǵa týra keledi. Jańa jyldan beri indetten oblystyń 17 turǵyny kóz jumdy. О́tken aptanyń ózinde ǵana 6 404 adamnyń koronavırýs indetiniń qarmaǵyna ilikkeni belgili bolyp otyr. Kún saıynǵy deneńdi túrshiktiretin derekterdi saralaıtyn bolsańyz, qaýiptiń kúnnen kúnge kúsheıip kele jatqanyn baıqaýǵa bolady. Osy sala mamandarynyń pikirine súıensek, pandemııa bastalǵaly indettiń munshalyqty ósý kórsetkishi bolmaǵan.
– Jaǵdaı óte kúrdeli, – deıdi oblystyq densaýlyq saqtaý basqarmasynyń basshysy Narıman Syzdyqov, – aýrýhanalarda tósektik oryndar jetkilikti bolǵanymen, indettiń tez taraıtyny sonshalyq, qaýip kúsheıe túsken. Buryn daıyndalǵan tósektik oryndardyń 50 paıyzy tolyp qalǵan.
Basqarma basshysynyń aıtýyna qaraǵanda, basty sebep – ekpe alýdan jaltarý. Al adamdarǵa ekpe jasap, qaýiptiń betin qaıtarýǵa tolyq múmkindik bar. О́tken jyldan beri óńirge 1 mln-nan astam vaksına dozasy jetkizilgen. Jyl basynan beri «Spýtnık Lite» vaksınasynyń 4 myń dozasy alynǵan. Solaı bola tura, jappaı ekpe alyp, tutas qaýipsizdikti qamtamasyz etý jaǵy áli de kemshin. Sóz arasynda 226 myńnan astam oblys turǵyny múlde ekpe almaǵanyn aıta ketý kerek. Olardyń 3,7 paıyzy, ıaǵnı 8 747 adam indet juqtyryp otyr. Al ekpe alǵandar arasynda bıyl 343 adam syrqatqa shaldyqqan. Ekpe alǵan adamdardyń eshqaısysy jan saqtaý bólimine túspegenin eskersek, qaýipsizdik sharasynyń tıimdiligi kózge kórinip tur.
«Qyzyl» aımaqtyń qursaýyndaǵy indet demigip tur. Sońǵy derekterge qaraǵanda, 40-qa jýyq naýqas jan saqtaý bóliminde jatyr. Ekpe eldi aman alyp qalatyn birden bir jol ekenin esten shyǵarmaǵan jón.
Aqmola oblysy