Qańtar oqıǵasyna qatysty negizsiz qýdalaýǵa ushyraǵandardyń quqyǵyn qorǵap, bostandyqqa shyǵarý maqsatynda qurylǵan «Amanat» qoǵamdyq komıssııasy bir aptalyq jumys qorytyndysyn baıandady. Jýrnalıster saýalyna jaýap bergen zańgerler, quqyǵy shektelgenin aıtyp arasha suraǵandar legi azaımaǵanyn aıtady.
Beıbit sherýge shyqqan adal nıetti azamattar men aram pıǵyldy qaskóılerdiń ara jigi ajyratylyp, ár oqıǵa ádil tarazylanýy tıis. Qoǵamnyń talap etip otyrǵany osy. Kópshilikti alańdatqan máseleni kókeıge túıip jazyqsyz jandardyń japa shekpeýine, qýdalanbaýyna, zańmen qorǵalýyna kómek kórsetýdi kózdegen belsendiler búginge deıin 36 azamattyń bultartpaý sharasyn ózgertýge atsalysyp, ıaǵnı qamaýdan eshqaıda ketpeý týraly qolhatqa aýystyrýǵa qol jetkizgen. Almatyda bastaý alǵan komıssııa jumysy endigi kezekte el óńirlerin aralamaq.
«2-aqpanda Taldyqorǵanǵa baramyz, odan ary ońtústik óńirlerge taban tireımiz. Qylmystyq is qujattaryn jiti zertteımiz. Úlgergenimizshe azamattar men olardyń advokattaryn qabyldap jatyrmyz. Tergeý ızolıatory jaǵdaıynda kameralardy aralap ondaǵylardyń árbirimen jeke júzdesip pikir almasýǵa qol jetkizdik. Respýblıkaǵa belgili quqyqqorǵaýshylarmen jáne qoǵam qaıratkerlerimen de aqyldasyp biraz ońdy nátıjege qol jetkizgen jaıymyz bar. Turǵyndardan Semeı qalasynda atalǵan jaıǵa qatysty problemalar órshigenin estip, sol óńirge belgili zańger Erlan Qalıev arnaıy bardy. Ol jergilikti prokoratýra ókilderimen birlese otyryp is-qımyl jasaýǵa komıssııa atynan kirisip ketti», deıdi komıssııanyń qurylýyna muryndyq bolǵan zańger Abzal Quspan.
Kóptegen jeli qoldanýshylary óz jazbalarynda tergeý-tekserý jumystarynyń ádil ári ashyq ótýin suraǵan. Birqatar sarapshylar da bul pikirdi qýattap «aıran ishken qutylyp, túbin jalaǵandar tutylmasa» deıdi. Komıssııa músheleri osy saryndas hattar men ótinish-tilekterdiń áli de kóptep kelip jatqanyn atap ótti.
– Tap qazirgi kezde qańtar oqıǵasyna baılanysty qamaýda otyrǵan áıel adamdardy, on segizge tolmaǵan jas balalardy jáne jaraqat alǵan-almaǵanyna qaramastan qolyna qarý ustap qalany talqandamaǵan, tonaý men urlyqqa qatyspaǵan, eshkimdi uryp-soqpaǵan, alaıda óz azamattyq únin bildirip beıbit sherýge shyqqandardy bosatýdy suraǵymyz keledi. Olardan qoǵamǵa eshqandaı qaýip joq. Olar ákki qylmyskerler emes. Eń quryǵanda tergeý aıaqtalǵanǵa deıin olardy qoǵamǵa qaýipsiz dep sanap, qamaýdan eshqaıda ketpeý týraly qolhatqa aýystyrýyn suraımyz. Jalǵyz Almatyda ǵana emes, barlyq óńirlerde osyndaı jaǵdaılar oryn alǵanyna kózimiz jetip otyr. Quqyq qorǵaý organdaryna, prokoratýraǵa osyndaı másele qoıyp otyrmyz. Abyr-sabyr kezinde túrli jaǵdaılar oryn alýy bek múmkin. Oqıǵa oryn alǵan mańnan ótip bara jatyp kezdeısoq qolǵa túskender de tabylyp jatyr. Olardyń jazyqsyz japa shekpeýi, qosaq arasynda ketip qalmaýy, otbasyna aman-saý oralýy mańyzdy. Osy tusta taǵy bir toqtala keter jaı, «Amanat» qoǵamdyq komıssııasynyń atyn jamylyp tergeý ızolıatoryna bir top adamnyń kelgeni jóninde habar keldi. Olar qamaýda otyrǵandardyń týystarymen kezdesken kórinedi. Ol azamattar bul áreketterdi qandaı pıǵylmen jasap otyrǵany bizge beımálim. Alaıda biz azamattardy saqtandyrǵymyz keledi. Osyndaı qıyn-qystaý sátti paıdalanyp, óziniń bas paıdasyn kúıttep ketetinder tabylýy múmkin. Sol sebepti «Amanat» qoǵamdyq komıssııasynyń jumysy tegin ekenin habarlaımyz, – deıdi advokat Mádı Myrzaǵaraev.
Qoǵam tarapynan qańtar oqıǵalary kezinde ustalǵandarǵa qysym jasalyp jatyr degen saryndaǵy únqatýlar jıilegen tusta Memleket basshysy atalǵan jaıǵa qatysty pikir bildirip, «Bas prokýratýraǵa basqa adamdardyń kinási qandaı dárejede ekenin anyqtaýdy tapsyramyn. Jaýaptylyqty aýyrlatatyn mán-jaı bolmasa jazany jeńildetý úshin shara qabyldaǵan jón», dep málimdeme jasaǵan bolatyn.
Zańgerler bir ǵana Almaty qalasynyń ózinde búginge deıin qylmystyq iske tartylǵan 200 adammen júzdesip, ustalǵandardyń is-materıalymen tanysqandaryn jetkizdi. Komıssııanyń qurylǵanyna nebári apta tolǵanyn eskersek, quqyqtyq kómek kórsetý áli de jalǵasa bermek.