Búgin, 19 naýryz kúni Beıbitshilik jáne kelisim saraıynda elimizdiń Din isteri agenttigi Mádenıetter men dinderdiń halyqaralyq ortalyǵy janyndaǵy buqaralyq aqparat quraldarynda dinı taqyrypty jarııalaý boıynsha Ádistemelik Keńestiń uıytqy bolýymen jýrnalısterge arnalǵan semınar ótti. Semınar aıasynda «Qazaqstan-2050» Strategııasyndaǵy din salasyna qatysty basymdyqtardy BAQ-ta jarııalaý ádisteri» taqyryby qozǵaldy. Bul is-sharaǵa Ádistemelik keńes quramyna kiretin tanymal dintanýshy-ǵalymdar, sarapshylar, sondaı-aq, dinı birlestikter men ÚEU ókilderi, jýrnalıster qatysty.
Semınardyń taqyryby aıasynda Dintanýshylar Kongresiniń tóraǵasy Ǵarıfolla Esim, «Bas redaktorlar klýby» QB prezıdenti Kenjebolat Mahmutuly, L.N. Gýmılev atyndaǵy EUÝ Etnıkalyq jáne dinı toleranttylyq jónindegi IýNESKO kafedrasynyń meńgerýshisi Ǵadilbek Shalahmetov, «Áziret Sultan» meshitiniń naıb ımamy Baqytjan О́tkelbaev, Astanadaǵy Qasıetti-Ýspen kafedraldyq soborynyń protoıereıi Dmıtrıı Baıdek, buqaralyq aqparat quraldarynda dinı taqyrypty jarııalaý boıynsha Ádistemelik Keńestiń tóraǵasy Aıdar Abýov sóz sóıledi.
Otyrysta oǵan qatysýshylar Qazaqstan Prezıdentiniń «Qazaqstan-2050» Strategııasynda aıtylǵan XXI ǵasyrdaǵy Qazaqstandaǵy din, dástúrli dinderdiń jas urpaq boıyndaǵy rýhanı qundylyqtardy qalyptastyrýdaǵy róli, dinı ekstremızm men onyń aldyn alý joldary syndy máselelerdi talqylady. Bul rette, otandyq jýrnalısterdiń din salasyndaǵy ózekti taqyryptardy qoǵamnyń árbir múshesine túsinikti ári obektıvti túrde jarııalaý jaıy sóz boldy.
Semınar sońynda jýrnalıster Ádistemelik Keńes múshelerine qoǵam nazaryn aýdaryp júrgen máseleler boıynsha óz saýaldaryn qoıdy.
Láıla Edilqyzy.
Derekkóz: Egemen.kz.
Foto: Ývision.kz.