QR Saýda jáne ıntegrasııa mınıstrliginde ómir sapasynyń jańa ulttyq standarttaryn ázirleý talqylandy, dep habarlaıdy Egemen.kz Tutynýshylardyń quqyqtaryn qorǵaý komıtetiniń baspasóz qyzmetine silteme jasap.
QR Saýda jáne ıntegrasııa mınıstrliginde mınıstr Baqyt Sultanovtyń basshylyǵymen apparattyq keńes ótti. Kún tártibinde tutynýshylardyń quqyqtaryn qorǵaý júıesiniń tıimdiligi qarastyryldy, osy másele boıynsha Tutynýshylardyń quqyqtaryn qorǵaý komıtetiniń tóraǵasy Asqar Tynysbekov baıandama jasap, halyqtyń ómir súrý sapasyn arttyrý tutynýshylardyń quqyqtaryn qorǵaýdyń tıimdi júıesimen tyǵyz baılanysty ekenin, olardan kelip túsetin shaǵymdar sany jyl saıyn artyp kele jatqanyn málimdedi. Keltirilgen derekter statıstıkaǵa negizdelgen. Máselen, 2020 jyly shamamen 21 myń adamnyń shaǵymy qaraldy. 2021 jyly olardyń sany 25,2 myńǵa deıin ósti, ıaǵnı ósim 120,5%-dy qurady.
«Qabyldanǵan sharalardyń nátıjesinde tutynýshylarǵa 363 mln teńgeden astam qarajat qaıtaryldy. Eń kóp shaǵym túsetin ekonomıkanyń eń problemaly salalary: bólshek saýda (55,3%), turmystyq qyzmetter (15,2%), elektrondyq saýda (5,3%), TKSh(4,3%), avıatasymaldar (1,8%)», dep túsindirdi Asqar Tynysbekov.
Tutynýshylyq shaǵymdardyń ósý jaǵdaıy bıznestiń óz mindetterin buzǵanyn, al tutynýshylar quqyǵynyń qorǵalýy tómen deńgeıde ekenin kórsetetdi.
Munyń bárin 2021 jyly júrgizilgen sosıologııalyq saýalnamanyń nátıjeleri dáleldeıdi.
20 myń respondenttiń 42%-y «Tutynýshylardyń quqyqtaryn qorǵaý týraly» zań normalaryn qoldanbaıdy dep jaýap berdi. 5%-y mundaı zańnyń bar ekenin bilmeıdi. Suralǵandardyń 45%-y múddeleri buzylǵan jaǵdaıda memlekettik organdardan kómek suraǵan joq. 14%-y tutynýshylyq quqyqtarǵa sáıkes jaǵdaı týraly suraqqa jaýap berýge qınaldy.
Áleýmettik saýalnamanyń qorytyndylary el turǵyndarynyń medısına salasynda qyzmet kórsetýge - 26,5%, ınternet-provaıderlerge - 26,4%, qalalyq qoǵamdyq kólikke - 21% qanaǵattanbaıtyndyǵyn kórsetti.