Sársenbi – jarmalyqtar úshin sátti kún boldy. Oblys ákimi Berdibek Saparbaevtyń bastamasymen qolǵa alynǵan «Týǵan jerge – taǵzym» aksııasy sheńberinde Qalbataý aýylynda áıgili balýan Dáýlet Turlyhanov jerlesterine halyqaralyq talaptarǵa saı áıdik sport keshenin tartý etti. Bul – Jarma jerine Olımpıada chempıondary jınalǵan kún edi. Atalǵan sharaǵa Olımpıadanyń úsh, álemniń toǵyz, Eýropanyń on eki dúrkin chempıony, Reseı Federasııasy Memlekettik Dýmasynyń depýtaty Aleksandr Karelın bastaǵan novosibirlik delegasııa arnaıy keldi. Sonymen birge, qazaqtyń rýhyn janyǵan Olımpıada chempıondary Jaqsylyq Úshkempirov pen Baqtııar Artaev jáne saltanatty sharanyń ıesi, áıgili balýan Dáýlet Turlyhanov bastaǵan mártebeli meımandar qatysty. – Jarma topyraǵyna osyǵan deıin dańqty balýan Aleksandr Karelın bastaǵan tórt birdeı Olımpıada jeńimpazynyń taban tireýi sııaqty oqıǵa bolǵan joq, – dedi Berdibek Saparbaev. Bul izgi sharanyń adam ómiriniń keıingi urpaqqa aıta júrer mańyzdy, aıtýly oqıǵa bolyp este qalatynyn jetkizgen óńir basshysy reseılik ataqty meımannyń osy is-sharaǵa arnaıy kelýi eki el arasyndaǵy dostyq peıildiń jarqyn kórinisi ekenin atap ótti. Qalbataý aýyly – Olımpııa oıyndarynyń kúmis jáne qola júldegeri, álem jáne Eýropa chempıony, Keńes Odaǵynyń jeti dúrkin jeńimpazy Dáýlet Turlyhanovtyń týǵan jeri. «Týǵan jerge – taǵzym» aksııasy aıasynda dańqty balýan shyǵys óńirine, onyń ishinde Jarma aýdanyna únemi qolushyn sozyp, túrli áleýmettik jobalardyń demeýshisi bolyp keledi. Al Turlyhanovtar áýletiniń bul jolǵy tartýy – aıryqsha. Bolat Turlyhanov atyndaǵy zamanaýı sport kesheninde 1 myń adam jattyǵa alady. Záýlim nysan úsh sport zalynan turady. Onyń ishinde boks, aýyr atletıka jáne kúreske arnalǵan ámbebap zaldar bar. Sport nysanynda kez kelgen dúbirli jarysty qysylmaı, emin-erkin ótkizýge múmkindik jasalǵan. Jarysty bir mezette 450 jankúıer tamashalaı alady. – Qazaqstanda, onyń ishinde shyǵys óńirinde týǵan ólke men aǵa tolqynǵa degen úlken iltıpat pen bıik qurmet qalyptasqanyn baıqadym. Búgin halyqtyq ıgi dástúrdiń arqasynda tamasha sport nysanynyń ashylýyna kýá bolyp otyrmyz. Sport kesheniniń paıdalanýǵa berilýi – barshamyzǵa óz elimizdiń patrıoty bolyp, týǵan ólkemizdi súıýdiń úlgisin kórsetti. Munda erteńnen bastap balalar sportpen shuǵyldana bastaıdy, olardyń arasynan keleshekte talaı chempıondar shyǵatynyna senemin, – dedi A.Karelın. Dáýlet Turlyhanov óz sózinde sport ǵımaratynyń ornynda 50-60-jyldary Abaı atyndaǵy orta mektep bolǵanyn jetkizip, jańa keshenniń el ıgiligine qyzmet etýine tilektestigin bildirdi. Eline eleýli balýannyń anasy Márzııa Turlyhanovaǵa gúl shoqtary tabys etildi. Kesh qonaqtary óńir basshysynyń «Týǵan jerge – taǵzym» aksııasy týǵan el men jerdi kórkeıtýge negiz bolatyn parasatty bastama bolyp otyrǵanyn aıryqsha atap ótti. Merekelik jıyn sońynda olımpıadashylar sherýi aýdan ortalyǵyndaǵy el Táýelsizdigine arnalǵan monýmenttiń ashylýyna qatysty. Sporttyq mereke barysynda Shyǵys Qazaqstan jáne Reseı Federasııasynyń Novosibir oblystarynyń jasóspirimder komandalary arasynda grek-rım kúresinen joldastyq kezdesý ótti. Dańqty balýan Aleksandr Karelınge shyǵysqazaqstandyq sportsúıer qaýym erekshe qurmet kórsetti. Máselen, mártebeli meıman oblys ortalyǵynda ótken respýblıkalyq jaratylystaný jáne matematıka pánderi boıynsha olımpıadanyń jabylý saltanatyna qatysty. Jarma aýdanyna bara jatqan kúre jolda Ulan aýdanynyń turǵyndary arnaıy tikken kıiz úıden dám tatyp, Ulystyń uly kúnimen quttyqtady. Al Qalbataýda jarmalyq aǵaıyndar reseılik qonaqqa bozshubar sáıgúlik syılap, ıyǵyna shapan japty. Sonymen birge, О́skemende jankúıerlerimen júzdesken A.Karelın Shyǵys Qazaqstan memlekettik ýnıversıtetiniń qurmetti professory atandy. Dýman ANASh, «Egemen Qazaqstan». Shyǵys Qazaqstan oblysy, Jarma aýdany.