Jaqynda jedel izdestirý sharasyn ótkizý barysynda Aqtóbe qalalyq IIB qyzmetkerleri esirtki satýshylardyń qylmystyq áreketiniń jolyn kesti. Esirtki bıznesiniń jolyn kesýshi polıseıler eki kúnde esirtki satýmen aınalysyp júrgen eki qala turǵynyn qolǵa túsirdi. Ústimizdegi jyldyń 13 naýryzynda esirtki bıznesine qarsy kúres bóliminiń qyzmetkerleri 43 jastaǵy qala turǵynyn ustap, onyń qolyndaǵy polıetılendi paketten ishinde jasyl tústi, ózindik ıisi bar ósimdik zat salynǵan, skotchpen oralǵan eki túıinshekti tárkiledi. О́tkizilgen saraptama qorytyndysyna sáıkes, alynǵan zat jalpy salmaǵy 2 keli quraıtyn keptirilgen marıhýana ekendigi anyqtaldy. Osydan bir kún buryn esirtki zatyn satýdyń taǵy bir deregin dál osy tártip saqshylary jedel-izdestirý sharasy kezinde anyqtaǵan bolatyn. Sonymen, esirtki saýdasyna qarsy áreket etýshi polıseıler 38 jastaǵy taǵy bir qala turǵynyn ustady. Onyń jalpy salmaǵy 20,66 gramm marıhýanany 18 000 teńgege ótkizgeni anyqtaldy.
Atalǵan eki derek boıynsha da qylmystyq is qozǵaldy. Kúdiktiler ýaqytsha ustaý oqshaýlaǵyshyna otyrǵyzyldy.
Satybaldy SÁÝIRBAI,
«Egemen Qazaqstan».
Aqtóbe oblysy.