Qarsy alady Naýryzyn bizdiń aýyl...
Syrtyldatyp sabyrdaı saǵatyńdy,
Taýysty ma, myna qys taǵatyńdy?
...Qarsy alady saǵynyp bizdiń aýyl,
Qasıetti áz Naýryz, jańa kúndi.
Eki mezgil erikten tys búlinip,
Qys pen kóktem bastady kúshti búlik.
Qarýlanǵan shýaqpen kerbez-kóktem,
Qyr basyna tastady qysty qýyp.
Qarsy alǵan soń naýryzdyń aqsha tańyn,
Ákem erteń kúıttemek baqsha qamyn.
...Kóktemgi bult sekildi Qyzyr baba,
Saýmalaıdy jibekteı aq saqalyn.
...Jibermesin jaratqan jaı-keselin,
Kóńilimniń eskegin qaıta esemin.
...Bala jigit usyndy arýyna,
Jınap ákep kóktemniń báısheshegin.
Gúlin ashyp, kóktemdi baý maqtady,
Alas, alas, jamandyq!..
Aýlaq bári!
Qatal qystyń bosanyp qursaýynan,
Syldyraıdy aq bulaq taý jaqtaǵy.
Alys qashyp boıdaǵy pendeshilik,
Móldir aspan qaraıdy jerge kúlip.
Jer dúnıe jatqandaı baıaý ǵana,
Áýenimen qustardyń terbetilip.
Unady ma kóktemnen alǵan aqpar?
Kórinisti ǵajaıyp qarmalap qal!
Basyn ıip arý-kún kelbetine,
Búr jarady kóktemde tal-daraqtar.
«Keler kúnniń shyraǵyn jaqtyń shyryn,
Kórgenime shúkir, – dep – baqtyń kúnin».
Oshaǵyna ornatyp qut-qazanyn,
Ájem tańnan qaǵady qaptyń túbin.
Shashasyna saltymnyń shań juqpady,
Ulys kúni jyr menen án qut-taǵy.
Atam da júr ilip ap ıyǵyna,
Jasyl ala shapanyn sandyqtaǵy.
Shuǵyla-nur janyńa jıylyp bek,
Baqyt tursyn basyńa buıyryp tek!
...Naýryz kóje – bas dámge osy kúngi,
Aq quıýda aq jeńgem ıilip kep.
Jaratqanym jany ıip mol-aq berer,
Qazaǵymda qashannan qomaqty óner.
...Aq darııa peıildi aýylyma,
Qonaqqa kel, naýryzda qonaqqa kel!..
Alma TÚSIPBEKOVA,
QR Joǵarǵy Sotynyń bas konsýltanty.