Elorda ákimi Altaı Kólginov óziniń Instagram paraqshasynda 250 aýla men qoǵamdyq keńistik abattandyrylatynyn habarlady, dep jazady Egemen.kz Nur-Sultan ákimdigine silteme jasap.
Búgin elorda ákimi apta saıyn dástúrli túrde ótkizetin qabyldaýda kezekte turǵan 11 otbasynyń ótinishterin tyńdady. Jalpy, turǵyndar tarapynan jıi qoıylatyn suraqtardyń biri - qala aýdandaryn abattandyrý máselesi.
«Bıyl aýlalarymyzdy aýqymdy túrde ózgertip, turǵyndardyń bos ýaqytyn taza aýada ótkizýi úshin jańa oryndar ashamyz. Jalpy, «Nur-Sultan – jaıly qala» master-jospary aıasynda bıyl 250-ge jýyq aýla men qoǵamdyq keńistikti abattandyrýdy josparlap otyrmyz. Qalalyq máslıhatta qarjylandyrý jospary bekitildi. Qala turǵyndarynyń ótinishi boıynsha bıyl jáne aldaǵy jyldary abattandyrylatyn mekenjaılar tizimi engiziledi» dep jazdy qala basshysy.
Aıta ketsek, «Halyqtyń bıýdjetke qatysýy» jobasy qalanyń barlyq aýdanyna engizildi. Bul joba qala turǵyndaryna óz aýlasynyń syrt-kelbetin ózgertýge múmkindik beredi. Aýdandyq ákimdiktermen jáne ýrbanıstıka ortalyǵymen birlesip, bıyl qala turǵyndarymen 200-den astam kezdesý ótkizildi, onda turǵyndar aldaǵy ýaqytta salynatyn aýlalar men qoǵamdyq keńistikter tujyrymdamasyn talqylady.
Máselen, aldaǵy ýaqytta «Agroqalashyq», «Kóktal», «Temirjolshylar», «Internasıonalnyı», «О́ndiris», «Kırpıchnyı», «Ońtústik-Shyǵys», «Úrker» eldi mekenderinde kórikti oryndar ashylady. Sondaı-aq, adam kóp júretin ýchaskeler de abattandyrylyp, serýendeýge arnalǵan promenadtar ashylady dep josparlandy.
«Úıler men keńselerdiń terezesinen aýlalardyń súreńsiz kelbeti emes, kórikti, jaıly, tartymdy oryndar kórinis tabýy kerek. Aýlalar men qoǵamdyq keńistikterdi biz kópfýnksıonaldy, sol sııaqty túrli sporttyq qyzyǵýshylyqtar men jas erekshelikterine qaraı daıyndaımyz», dep qosty ákim.
Sońǵy jyldary qalada 500-den astam aýla aýmaǵy men qoǵamdyq keńistik abattandyryldy, atap aıtqanda kópir asty keńistikter, skeıt-aımaqtar, promenad, teatr býlvary, eldi mekenderdegi saıabaqtar men gúlzarlar, kóshe sportyna arnalǵan kolızeı, qutqarýshylardyń, medısına qyzmetkerleriniń, muǵalimderdiń qurmetine arnaıy skverler ashyldy.