«Eńbek resýrstaryn damytý ortalyǵy» (ERDO) AQ Boljamdaý departamentiniń deregi boıynsha, Qazaqstanda bıyl jaldamaly jumyskerlerdiń sany 6,8-6,9 mln adamdy quraıdy. Jaldamaly jumyskerlerge suranys 188,6 myń adamdy quraıdy, onyń jartysy jumystan shyǵatyn jaldamaly jumyskerlerdi almastyrý suranysyna saı keledi. Sonymen qatar kúzetshiler, býhgalterler, satýshylar men júrgizýshiler eńbek naryǵynda eń tanymaly jáne jappaı suranysta qala beredi.
«О́ńirler boıynsha neǵurlym eleýli jıyntyq suranys, jumystan shyǵatyn jaldamaly jumyskerlerdi almastyrý boıynsha suranysty qosa alǵanda, Almaty qalasynda, sondaı-aq Almaty jáne Jambyl oblystarynda oryn alady. Al salalar boıynsha bilim berý, aýyl sharýashylyǵy jáne saýda baǵyttarynyń qyzmetkerleri kóbirek talap etiledi», dedi ERDO Boljamdaý departamentiniń dırektory Dmıtrıı Shýmekov.
Sarapshylardyń aıtýynsha, áıelderdiń zeınetkerlik jasyn arttyrýdy eskere otyryp, jalpy eńbekke qabiletti jastaǵy halyq sany bıyl 11,4 mln adamǵa jetedi (2021 jylǵy deńgeımen salystyrǵanda 98 myńǵa ósedi).
«Bıyl jumys kúshiniń sany 9,2-9,3 mln adamdy quraıdy, ıaǵnı jalpy ótken jyldyń deńgeıinde saqtalady. Alaıda bizdiń boljamymyz boıynsha, elimizdiń úsh iri qalasynda ekonomıkalyq belsendi halyqtyń jıyntyq sany osy qalalardaǵy jastar úlesiniń artýy saldarynan jáne kóshi-qon sebepteri boıynsha 54 myń adamǵa ósedi», dep bólisti D.Shýmekov.
Sondaı-aq boljamdarǵa sáıkes, jumyssyzdar sany 461-465 myń adam deńgeıinde bolady, al jumyssyzdyq deńgeıi 5%-dan aspaıdy.
Bilim berý júıesi tarapynan orta mektepti shamamen 261 myń adam bitiredi nemese tastap ketýi múmkin dep kútilýde, onyń ishinde 109 myń adam – 9-synyptan keıin, al 152 myń adam – 11 (12)-synyptan keıin shyǵyp ketýi yqtımal. Kolledjderge osy sannan 131 myńǵa jýyq adam, joǵary oqý oryndaryna 103 myń adam barady. Qalǵan burynǵy oqýshylar qatarynan azamattar Qazaqstannan tys jerlerge shyǵady (~10 myń adam) nemese eńbek naryǵyna shyǵady (~17 myń adam).
Osy jyly TjKB-ny shamamen 145 myń adam tabysty aıaqtaıdy dep kútilýde, onyń ishinde 90 myńy – negizgi orta bilim bazasynda jáne 49 myńy –jalpy orta bilim bazasynda, onyń ishinde shamamen 16,4 myń adam joǵary bilim berý uıymdarynda oqýyn jalǵastyrady. Budan basqa, joǵary oqý oryndarynan joǵary bilimi bar 163,5 myń adam jáne joǵary oqý ornynan keıingi bilimi bar 20 myńǵa jýyq adam shyǵarylady.
Jalpy alǵanda, bilim berý deńgeıleri arasyndaǵy kúrdeli aýysýlardy eskere otyryp, eńbek naryǵyna shamamen 295 myń jumysker shyǵady dep kútilýde. Bazalyq ssenarıı kezinde jaldamaly jumysshylarǵa qajettilik, buryn aıtylǵandaı, 188,6 myń adamdy quraıdy. Tıisinshe, qalǵan 106 myń adam jeke nemese obektıvti sebepter boıynsha ózin ózi jumyspen qamtýǵa, onyń ishinde jeke kásipkerler mártebesine kóshýi múmkin, dep habarlady Eńbek jáne halyqty áleýmettik qorǵaý mınıstrliginiń baspasóz qyzmeti.