Elimizde alǵash ret ǵylym salasynyń saqalary saralandy. Byltyrdan bastap qolǵa alynǵan respýblıkalyq «Úzdik ǵylymı qyzmetker-2021» baıqaýy endi jyl saıyn zertteýshilerdi yntalandyrý, olardyń eńbegin baǵalaý maqsatynda ótkizilmek. Atalǵan ǵylym báıgesiniń jaqynda shyqqan qorytyndysy boıynsha 50 ǵalym 6 mln teńge kóleminde syıaqy aldy.
«Úzdik ǵylymı qyzmetker-2021» baıqaýynda elimizdiń 6 ǵylymı-zertteý ınstıtýty men joǵary oqý oryndarynyń 50 ǵalymy jeńimpaz atandy. Úzdikter qarjylaı syıaqyǵa qosa keýdege tósbelgiler taǵynyp, sertıfıkattardy ıelendi. Jeńimpazdardy marapattaý saltanatynda sóz alǵan Bilim jáne ǵylym mınıstri Ashat Aımaǵambetov: «Bıyldan bastap otandyq ǵylym salasy damýynyń jańa kezeńi bastaldy. 3 myńǵa jýyq ǵalym jobasyna grant utqan-utpaǵanyna qaramastan turaqty túrde jalaqy alady. Turaqty qarjylandyrý zertteýlerdi kedergisiz júrgizýge múmkindik beredi. Sondaı-aq granttyq jáne maqsatty qarjylandyrý mehanızmin ózgerttik. Sońǵy jyldary ǵylym salasyn qarjylandyrý eki ese ósti. Prezıdenttiń tapsyrmasy aıasynda osy jańashyldyqtardy bekitken zań qabyldandy. Biz úshin barlyq prosedýranyń ashyqtyǵyn qamtamasyz etý mańyzdy», dedi.
Mınıstr óz sózinde ǵylymı qaýymdastyqqa ǵylymnyń damýyna qosqan úlesi úshin alǵys bildirdi jáne Memleket basshysynyń qoldaýymen ǵylym salasynda zańnamalar jetildirilip, qarjylandyrý eki ese óskenin aıtty.
«Jas ǵalymdarǵa jan-jaqty qoldaý kórsetilip, ulttyq ǵylymı-zertteý ınstıtýttarynyń materıaldy-tehnıkalyq bazasy jańartylyp keledi. Sondaı-aq ǵalymdar jetekshi ǵylymı ortalyqtarda tájirıbeden ótýge jiberiledi, ǵylym salasyndaǵy bıýrokratııany toqtatý boıynsha jumys júrgizilip jatyr», dedi A.Aımaǵambetov.
Mınıstrliktiń málimdeýinshe, baıqaýǵa tapsyrylǵan ótinimder arnaıy qurylǵan aqparattyq platformada qabyldanǵan. Qujattardy tekserý komıssııasynyń quramyna sarapshylar, ǵalymdar, Ǵylym akademııasynyń ókilderi, Jas ǵalymdar keńesi jáne Jas ǵalymdar alıansynyń, sondaı-aq ǵylymı uıymdardyń músheleri endi.