Kúre joldyń boıynda qaýip kóp. Sol qaýipti ereje saqtamaıtyndardyń týdyryp otyrǵandary belgili. Oblystyń jol saqshylary «Qaýipsiz jol» jedel aldyn alý sharalaryn ótkizý barysynda zań buzýshylyqtardy áshkereledi.
Zań qataıyp, mas kúıinde kólik tizgindegenderdi jazalaý kúsheıgenimen, bul oraıdaǵy qaterdiń áli de seıilmegenin ańǵarýǵa bolady. Máselen, úsh kúnniń ishinde 26 júrgizýshiniń mas kúıinde kólik júrgizgendigi belgili bolyp otyr. Buryn júrgizýshi kýáliginen aıyrylǵan 10 azamat jasyrynyp kólik júrgizip kele jatqan kezinde jol saqshylarynyń quryǵyna ilikti.
– 264 adam qaýipsizdik belbeýin taqpaǵany úshin jaýapkershilikke tartyldy, – deıdi oblystyq Polısııa departamenti jergilikti polısııa qyzmeti basqarmasy bastyǵynyń orynbasary Erbolat Qusaıynov, – 122 adam tehnıkalyq baqylaýdan ótpegen kólikti paıdalanǵan. Jedel profılaktıkalyq sharanyń maqsaty – apattyń aldyn alý. Bizdiń tarapymyzdan osyndaı jumys júıeli júrgizilgenimen, jalpyǵa ortaq tártipke moıynsunbaıtyndar jeterlik. Máselen, kólik quraldaryn mas kúıinde júrgizgeni úshin jeti jylǵa deıin júrgizýshi kýáliginen aıyrylady, sonyń ózinde de tyıylmaı otyr.
Kólik júrgizgen kezde ózińnen buryn ózgege keltirer zalaldy da oılaý kerek. Ádette, jaýapty iske mán bermeı qaraıtyndardyń kesirinen beıkúná adamdar zardap shegip jatady. Kún saıyn oryn alyp jatqan jol-kólik oqıǵalarynyń, jantúrshigerlik apattardyń bir sebebi osynda. Bálkim, ózge adamnyń ómirine qaýip tóndirip, mas kúıinde kólik júrgizetinderge qoldanar sharany áli de qataıta túsý kerek shyǵar.
Aqmola oblysy