Asylyn asqaqtatqan Almaty

Almaty qalasy ákimdiginiń bastamasymen kórnekti aqyn, Memlekettik syılyqtyń laýreaty Tumanbaı Moldaǵalıev turǵan úıge eskertkish taqta ashyldy. Saltanatty sharaǵa Jara­tylystyń kóktemin jyrlap ótken jasampaz aqynnyń týǵan-týystary men qalamdas dostary, zııaly qaýym ókilderi qatysty. – Tumanbaı Moldaǵalıevtiń móldir sezim, ásemdik pen tazalyq, mahabbat týraly jazǵan óleńderi birneshe býyndy tárbıeledi. Onyń sózine jazylǵan ánderi áli de óskeleń urpaqty tárbıelep keledi. Aqynnyń jasaǵan aýdarmalary elimizdiń asyl qazynasyna qosylǵan qundy dúnıe dep bilemiz, – dedi qala ákimi Ahmetjan Esimov el aldynda sóılegen sózinde. Almaty oblysyndaǵy Eńbek­shiqazaq aýdanynyń Jarsý aýylynda dúnıe esigin ashqan aqıyq aqyn 22 jasynda «Stýdent dápteri» dep atalatyn óleńder jınaǵymen qalyń oqyrmanyna tanylyp, óz ómiriniń sońǵy sátine deıin týǵan halqynyń ádebıetine zor eńbek sińirgeni belgili. Ol aldymen «Pıoner» jýrnalynda qyzmet etip, odan keıin «Baldyrǵan» jýrnalynda jaýapty hatshy boldy. «Jazýshy» baspasy janyndaǵy balalar jáne jastar ádebıetiniń bas redaksııasynda qyzmet etip, ózinen keıingi talant ıeleriniń dańǵyl jolǵa túsýine jaǵdaı jasady. «Jalyn» jýrnalynyń bas redaktorlyǵy qyzmetin abyroımen atqaryp, Qazaqstan Jazýshylar odaǵynyń hatshysy, ómiriniń sońǵy sátine deıin «Baldyrǵan» jýrnalynyń bas redaktory qyzmetin atqardy. Aqyn 1967 jyly jaryq kórgen «Jańa dápter» atty jyr kitaby úshin Qazaqstan Lenın komsomoly syılyǵynyń laýreaty atandy. Almaty qalalyq keńesiniń depýtaty boldy. Onyń «Júrektegi jazýlar» jınaǵy joǵary baǵalanyp, ádebıet salasyndaǵy Abaı atyndaǵy Memlekettik syılyqty ıelendi. 1992 jyly Tumanbaı Moldaǵalıevke Fı­zýlı atyndaǵy halyqaralyq túrki dú­nıesi aqyn­dary syılyǵy tapsyryldy. Tumanbaı Moldaǵalıev «Qustar qaıtap barady», «Baqyt qushaǵynda», «Ánim sen ediń», «Ertis valsi», «Sha­qyrady kóktem» sekildi el súıip shyr­qaıtyn kóptegen ánderge sóz jazdy. N.Tilendıev, Sh.Qaldaıaqov, B.Jamaqaev, Á.Beıseýov sekildi qa­zaq mýzykasynyń tarlandarymen shyǵarmashylyq tyǵyz baılanysta boldy. Sonymen qatar, álem áde­bıetiniń jaryq juldyzdary re­tinde moıyndalǵan Dj.Baıron, M.Lermontov, T.Shevchenko, O.Tý­ma­­nıan, R.Gamzatov sekildi talant ıeleriniń shyǵarmalaryn qazaq ti­line aýdardy. Halqymyzdyń jar­qyn júrekti aqyny Tumanbaı Mol­daǵalıevti máńgi este saqtaý maq­satynda qoıylǵan eskertkish taq­tanyń ashylý saltanatynda onyń zamandas dostary sóz sóılep, estelikter aıtty. Týǵan-týystary osy sharany uıymdastyrýshylarǵa rızashylyǵyn bildirip, alǵystaryn jetkizdi. Qanat ESKENDIR, «Egemen Qazaqstan». ALMATY. ––––––––––––––––––– Sýretterdi túsirgen Bersinbek SÁRSENOV.