Orazaqyn ASQAR,
halyqaralyq «Alash»
syılyǵynyń laýreaty.
MEREKE-MEIRAM
Tań atty túndi erte túrip mańnan,
Úlken-kishi tysta júr turyp tańnan.
Otaǵasy bulaqtyń kózin ashty,
Qoqysty aldy bóget bop turyp qalǵan.
Shyqqandaı úıge beıne syımaı bári,
Áje ketti qoraǵa qyı jaıǵaly.
Balalary tekemet, syrmaq qaǵyp,
Esik syrlap báıbishe úı maılady.
Sharbaqtardy bir tynym tappaı túzep,
Ata júr butalardy attaı kúzep.
Sý tasyǵan kelinder báseń sóılep,
Úlken baryn umytpaı saqtaıdy izet.
Kúlip shyqty nur shashyp shoqyǵa kún,
Qopsytty jigit baqtyń topyraǵyn.
Isten qoly bosaǵan bir-eki qyz,
Merekege daıyndap otyr ánin.
Boıjetkenge bolysty kúlip inim,
Bos júrgen joq adamnyń biri búgin.
Sándi kóshe, taza aýla, jınaqy úıde,
Kútip almaq ulystyń uly kúnin.
TOIǴA KELDI
Toılasyn dep naýryzdy kóktem keldi,
Tazartty qardan jazyq, bókterlerdi.
Tabıǵat anamyzdyń meıiri de,
Betińnen jyly leppen ópken jeldi.
Toılaýǵa naýryzdy qustar keldi,
Saǵynyp balapan bop ushqan jerdi.
Teńelip kún menen tún kúsh synasyp,
Kún jeńip, tún eriksiz qysqardy endi.
Toılaýǵa naýryzdy tólder týdy,
Arnadan asyrdy ózen, kólder sýdy.
Qozy-laq, qaz-úırektiń áni dep bil,
Qora men aıdynnan oı bólgen shýdy.
Toılaýǵa naýryzdy gúl ashyldy,
Buıyǵyp úıde otyrý kúná syndy.
Qalt etken janarynan ushqyn shashyp,
Qarasy qalqanyń da unasymdy.
Toılaýǵa naýryzdy biz de keldik,
Bizderdi tapsyn toıdan izdegen jurt.
Usyndy ár úı kópke naýryz kóje,
– Aýyz tı, – dep, – adal dám-tuz degen qut.
Toılaýǵa naýryzdy keldi dostar,
Kún týdy erkindikke keń qulashtar.
Tórt qubyla túgendeldi orta tolyp,
Án shyrqap, bı bılesin endi jastar!
QYZ BEN JIGIT ÁZIL-QALJYŃY
– Sizdi kórip sermedi jyr qulashyn,
Keýdemde bir qomdanyp turdy lashyn.
Naýryzda jón suraý aıyp emes,
Amansyń ba? Atyń kim, qurbylasym?
– Jyr degeniń ániń be, jer tepkizgen,
Jón suraıtyn bar ma edi erkek bizden?!
Jas kezinde atam at suramaı-aq,
Syılyq berip ájemdi selt etkizgen.
– Ne deseń de, teńsińder erikteriń,
Syı jınaýǵa alańǵa kelip pe ediń?
О́ıtetindeı eskerip, erte turyp,
О́ziń maǵan «uıqy ashar» berip pe ediń?
– Beıtanysqa biz qashan «taıan» dedik,
Qozy kelse bolar ma Baıanda erik.
Uıqyń áli, jigitim, ashylmasa,
Turmyn ba men túsińde aıan berip?!
– Aǵattyǵym boldy-aý bul bir istegen,
Endigide jónimmen durys kelem.
Naýryzyń, qurbylas, qutty bolsy.!
Tanysarmyz bir kórgen bilis degen.
ÁJENIŃ ÁNI
Adal astan buıyrǵan,
Dám tatsyn jurt jıylǵan.
Bıdaı saldym kójege
Mol bolsyn dep bıyl nan.
Kelin bitken jerik bop,
Bolsyn ulǵa serik kóp.
Tary saldym kójege
Bolsa eken dep jenit kóp.
Jyrshy astynda jaraý kók,
Shapsyn qyzyltanaý bop.
Kúrish saldym kójege,
Kóp bolsyn toıda palaý dep.
Aýyzdan aq ketpesin,
Maıdan erin keppesin.
Kelgen rıza, ketken toq,
Qutty qonaq et jesin.
Ashyq bolsyn qas-qabaq,
Taspen atqandy aspen at.
Beıtanys ta, tanys ta
Búgin tórde bas qonaq.
Arpa, bıdaı, tary bar,
Qatyq, malta – aǵy bar.
Ishiletin, jeıtinniń
Bul kójede bári bar.
Oshaqta kóp shoq áli,
Astyń aýyr obaly.
Astan úlken eshkim joq,
Qazan aýzy joǵary.
«Arpa, bıdaı as eken,
Altyn, kúmis tas eken».
Jomarttyǵyn jurtymnyń
Jer-jıhanǵa pash etem!
Atanyń aq batasy
Nıetteriń aq bolsyn!
Naýryzdyń aqsha qaryndaı.
Bastaryńa baq qonsyn,
Shashtaryńnyń barlyq
talyndaı!
Sanasy asyp adamnyń,
Kóńilde kir qalmasyn.
Quty qashyp jamannyń,
Jaqsy tapsyn jalǵasyn.
Tynysh bolsyn dalamyz,
Túgel bolsyn nýymyz.
Taza bolsyn aýamyz,
Tunyq bolyn sýymyz.
Qaıǵy-ýaıym joq bolsyn,
Oralmasyn kez ógeı.
Yrysymyz kóp bolsyn
Búgingi naýryz kójedeı!
ALMATY.