Eńbek jáne halyqty áleýmettik qorǵaý mınıstrligi 2022 jylǵy 11 qańtarda Parlament Májilisiniń otyrysynda Memleket basshysynyń halyqqa kórsetiletin jumyspen qamtý sharalarynyń tıimdiligin arttyrý boıynsha bergen tapsyrmalaryn oryndady, dep habarlady atalǵan vedomstvonyń baspasóz qyzmeti.
Tapsyrmalardy oryndaý sheńberinde bıyl 7 aqpanda «Halyqty jumyspen qamtýǵa járdemdesýdiń keıbir máseleleri týraly» Qazaqstan Respýblıkasy Densaýlyq saqtaý jáne áleýmettik damý mınıstriniń 2016 jylǵy 14 maýsymdaǵy 516 buıryǵyna jáne Kásipkerlik bastamashylyqqa járdemdesý jónindegi sharalardy uıymdastyrý jáne qarjylandyrý qaǵıdalaryna (budan ári – qaǵıdalar) ózgerister engizildi.
2016 jylǵy buıryqqa engiziletin ózgerister aıasynda jastarǵa jáne halyqtyń áleýmettik osal toptaryna beriletin bıznesti damytýǵa arnalǵan granttar kólemin 400 AEK-ke deıin (2022 jyly – 1,2 mln teńge) ulǵaıtý kózdelgen.
Granttar berý jastar men halyqtyń áleýmettik osal toptaryn óz isin ashý úshin bastapqy quraldarmen qamtamasyz etedi. Osy jyly barlyǵy 20 myń adamdy granttarmen qamtamasyz etý josparlanyp otyr.
Qaǵıdalarǵa engizilgen ózgeristermen jastar praktıkasyna jáne «Alǵashqy jumys orny» jobasyna qatysatyn jas mamandardyń jalaqy mólsherin 30 AEK-ke deıin ulǵaıtý, sondaı-aq jastar praktıkasyna jáne «Alǵashqy jumys orny» jobasyna qatysý merzimderin tıisinshe 12 jáne 18 aıǵa deıin ulǵaıtý kózdeledi.
Bul ózgerister jastardyń alǵan mamandyǵy boıynsha jumys ornyna sátti beıimdelýine jáne bekitilýine yqpal etedi.
Aǵymdaǵy jyly jastar praktıkasyna keminde 22 myń adamdy jiberý, sondaı-aq «Alǵashqy jumys orny» jobasyna keminde 3 myń jastyń qatysýyn uıymdastyrý josparlanýda.